Komandanti i Komandës Operacionale të NATO-s, Gjeneral, Tod Daniel Wolters ditën e sotme mori medaljen e “Ylli i Madh i Mirënjohjes Publike”, e cila iu dorëzua nga kryeministri, Edi Rama në një konferencë për mediat.
Wolters u shpreh i prekur lidhur me vlerësimin e bërë duke thënë se ishte hera e vetme që ishte ndjerë kaq i mallëngjyer ndërsa tregoi edhe për një pikturë të bërë dhuratë nga Rama.
“Kurrë në jetën time të shkurtër nuk kam qenë kaq i mallëngjyer. Për mua kjo është mbledhja e nje jete. Dua ta nis duke folur për kombin tuaj, për të pasqyruar vlerat tuaja. Shqipëria është vëllai i madh në rajonin e Ballkanit Perëndimor. Vendet e tjera kur zgjohen në mëngjes shohin vendin tuaj që më pas të kenë ku të drejtohen. Nga 2016 e deri më tani, Shqipëria ka përparuar.
Më duhet të ndaj një histori me kryeministrin, më ka dhënë një prej dhuratave që unë do e kujtoj gjithë jetën. Në zyrën time kanë parë një pikturë, ajo vjen nga një histori e mrekullueshme me kryeministrin. Ne do kemi edhe 100 vite të tjera edhe më entuziaste sesa 100 vitet e para të marrëdhënies amerikano-shqiptare”, tha Wolters.
Ndërsa Kryeministri Edi Rama u shpreh “ndonjëherë miqtë tanë evropianë ndiejnë një lloj kureshtie se si ndodh që Shqipëria, shqiptarët janë kaq pro amerikanë. Jam i sigurt që përherë nëse disa prej tyre nuk janë familjarizuar me historinë tonë mund të dukemi budallenj për ta thënë troç, ne mund të jemi gjithçka por nuk jemi budallenj”.
“Ne jem i gjithçka, por jo budallenj. Ne jemi këtu në këtë pjesë historie të lidhur kaq fort me këtë aleat dhe këtë mik, falë edhe një pjese tjetër të historisë që e ndërpreu këtë marrëdhënie, që këtë vit shënon 100 vjetorin e saj. Është 100 vjetori i marrëdhënieve shqiptari-amerikane.
U ndeshëm me gjysmë shekulli heshtje nga pala amerikane, dhe ne duke qenë të izoluar. Ne e nisëm atje ku e lamë në 1991 dhe tashmë është vendosur një gur themeli i ri, ku ne mund të kremtojmë raportin më të frytshëm të SHBA dhe Shqipërisë. Ndonjëherë është shumë kërkuese. Ndonjëherë duket më sfiduese nga mund të përballojmë. Por në fund të fundit është përmirësues për ne. Nuk guxoj asnjëherë të pyes ambasadorët amerikane se çfarë mësojmë nga Shqipëria, por ne mësojmë shumë nga këta partnerë tejet të fuqishëm dhe të ditur”, tha Rama.
