Policia e Kukësit ka konfirmuar arrestimin në Morinë të Ismail Morinës ose Ballistit, i njohur si “njeriu i dronit” në ndeshjen Serbi-Shqipëri, në Beograd.
Sipas policisë, Ballisti ishte në kërkim pasi ndaj tij rëndon një denim me 5 muaj burgim për armëmbajtje pa leje.
“Efektivët e Komisariatit të Policisë Kukës ndaluan shtetasin Ismail Morinaj, 40 vjeç, banues në fshatin Shikaj, Kukës, i shpallur në kërkim për llogari të DVP Durrës”, konfirmoi policia.
“Ky shtetas u ndalua pasi gjatë verifikimeve ka rezultuar person në kërkim nga Drejtoria Vendore e Policisë Durrës. Për këtë shtetas, Gjykata e Rrethit Gjyqësor Durrës ka vendosur revokimin e vendimit penal të Gjykatës së Rrethit Gjyqësor Tiranë, për lirimin e tij me kusht dhe ka caktuar vuajtjen e pjesës së mbetur të dënimit, 5 muaj e 12 ditë burgim, për veprën penale ‘Prodhimi dhe mbajtja pa leje e armëve luftarake dhe municioneve’. Procedurat e mëtejshme për këtë shtetas do të kryhen nga DVP Durrës”, thuhet më tej në njoftimin e bluve.
Arrestimin e Ballistit e njoftoi më herët ish-kryeministri Sali Berisha, i cili përmes një postimi në FB, kërkoi dhe lirimin e Ballistit.
