Ish-Kryeministri Sali Berisha ka replikuar nga foltorja e Kuvendit me Kryeministrin Edi Rama lidhur me Butrintin, ndërsa mazhoranca duket e vendosur për të miratuar marrëveshjen për menaxhimin e Parkut, nga i cili janë shkëputur 830 ha për ndërtimin e një resorti me 630 vila.
Ndërsa Kryeministri Edi Rama ka ironizuar akuzat e opozitës, madje është mburrur me stadiumin e ri Air Albania, ku do të luhet edhe finalja e Conference League, apo ndërtimin e Teatrit të ri Kombëtar, ku sipas tij do të ngjiten në skenë edhe trupat ndërkombëtare, Berisha tha se afera e Butrintit i ka të gjitha fijet te Kreu i Qeverisë.
Madje, Berisha e cilësoi Ramën “Il Padrino”.
“Të gjithë hektarët janë për klientelën e Ramës, ndërsa për aferat e tjera unë them ai bord përbëhet nga njerëzit më të afërt të tij.
Zonja ministre ka marrë përsipër të qëndrojë dy vjet sipas marrëveshjes, të gjitha fijet të çojnë te Il Padrino, mos u fsheh pas fondit e Ministrisë.
Nuk kam akuzuar Fondacionin Amerikan për korrupsion. Ai ka bërë projektet më të shkëlqyera, por u përdor nga Edi Rama për të shpërbërë parkun, 830 hektarë për klientelën.
Sa i përket aferave të tjera, mund të them kaq. Ai bord, përbëhet i tëri nga njerëz më të afërt të tij, përveç njërit. Ka qenë këshilltar i Edi Ramës, i paguar nga Fondacioni i Shqipërisë së hapur. Sarapuli dhe Mata, famoz për lidhjen e tij me Ramën.
Mos u fsheh pas Fondit, as pas Hoxhsit, se je veç ti pas këtyre aferave. Sa i përket ndeshjes do them diçka. Kur erdhi zëvendëspresidenti tha: ndeshja anulohet. I tha: do të sjell Erjon Veliajn. Ky i tha: mos ma sill atë rrugaç. Se Veliaj i kishte çuar një sms vëllait të Lefter Kokës”, tha ai.
