Nga Boldnews.al
Nëse me fatkeqësinë shqiptare, kryeministri tregon madhështinë, arrogancën, ironinë, përbuzjen dhe pikturimin surreal të një të vërtete që nuk ekziston, përballë fqinjëve është kokëulur dhe pa asnjë vizion. Kjo u tregua sot, ku për mjerimin tonë, fqinjët vijojnë të na nëpërkëmbin, jo si komb, por si shtet abstrakt që veç fjalëve në tym dhe tymit për të mbuluar të vërtetën, nuk di të bëjë gjë tjetër.
Ministrja e Jashtme dhe Evropës Olta Xhaçka me urdhër nga lart e bëri detyrën e saj. I kërkoi homologut grek që të diskutohen në të ardhmen çështja e pronave të çamëve të dëbuar nga trojet e tyre dhe ligjin e luftës që qëndron që nga viti 1940. Por homolgu grek ja ktheu aty në vend haraçin kësaj idiotësie deklaratash, kur u shpreh se nëse ngrini çështje të tilla, atëherë Greqia do na pengojë për në rrugën Evropiane.
Bujë e madhe. Lajm pas lajmesh: “Xhaçka ngre çështjen çame”; Ministrja vë në siklet homologun grek…. Lloj e soj sajesash të tymta për sytë e zenë të qytetarëve. Por vetë Rama po me agjendë të përcaktuar e zbuti situatën, kur deklaroi se me ministrin grek kishte pasur një takim të frytshëm. “Me Ministrin e Jashtëm të Greqisë Nikos Dendias, në një bisedë të frytshme për çështje me interes që bashkojnë popujt tanë”, shkruan Rama bashkangjitur fotove të publikuara.
Duke i besuar Ramës në deklaratë do të thotë se vetë ai as që e ka përmendur çështjen çame apo ligjin e luftës, pasi të dyja këto qëndrime nga grekët cilësohen si çështje që “nuk bashkojnë”, por i ndajnë dy popujt. Çështjet në interes kombëtar, apo edhe njerëzor siç është dëbimi, dhunimi, vrasjet që përblidhen në genocid ndaj çamëve, nuk mund të zgjidhen me deklarata boshe dhe pa vepra.
E vërteta është tërësisht tjetër. Prej nëntë vitesh që Rama është në krye të qeverisë grekët na kanë ngulur në mesin e vendit varreza të ushtarave të tyre, duke i kthyer në vende pelegrinazhi dhe ushqim të bollshëm për ekstremistët nacionalistë, që livadhisën lirshëm për shumë vite duke tundur flamujt e Vorio Epirit. Po ashtu edhe ndarja e detit për pak sa nuk kaloi në një nënshkrim të frikshëm ku do përfitonim “ujë e kripë”, por do linim jashtë zonat ekonomike, kryesisht naftën dhe gazin. Shqipëria ofroi shumë por mori vetëm “vulat apostile” për emgrantët shqiptarë që rropatashin në institucionet greke.
Seriozitetin e shtetit tonë e tregojmë aty në konsullatta dhe ambasadën shqiptare në Athinë, kur mijëra emigrantë sorollaten nga kapadaitë e Rilindjes ku për çdo shërbim vendosnin tarifa, duke punësuar me dhjetra sekserë të sërës së tyre. Këto janë hallet e përditshme, bashkë me çështjen çame që vuan pasojat e genocidit që kurrë nuk i njoh nga pala greke. Edhe kur dosja hapet, ajo mbetet vetëm një deklaratë, që vlen për trutë e larë dhe shpëlarë në lavatriçen propagandistike të Rilindjes, për ti dhënë qeverisë “ngjyra patriotizmi”. Ministrja Xhaçka hodhi një fije shkrepëse të ndezur, por aty erdhi “zjarrfikësi” kryeministër duke lënë pas me urdhër të tij vetëm tymin propagandistik.
