Në sallën e Kuvendit janë duke u zhvilluar debate mes opozitës dhe mazhorancës pasi ditën e sotme në rend dite është votimi i projektligjit për “Butrintin”, që do të kalojë në administrimin e një fondacioni shqiptaro-amerikan.
Deputetja e PD-së Ina Zhupa ka qenë ndër zërat më kritikë të qeverisë në lidhje me dhënien me PPP të Butrintit. Zhupa ka thënë shpesh se Butrinti përfaqëson historinë e nuk mund të jepet me koncesion.
Zhupa mbante veshur edhe një bluzë, ku shkruhej “Historia nuk jepet me koncension”, shoqëruar me foto nga Parku i Butrintit.
Ajo shtoi se qeveria shqiptare, për këtë projekt nuk ka marrë mendimin e asnjë arkeologu, duke shtuar se nuk u mor aprovim as nga ana e UNESCO-s.
Po ashtu, sot përpara parlamentit u zhvillua protesta e aktivistëve, arkeologëve, por edhe ekspertëve të fushës, që kanë thënë se dhënia me PPP e Butrintit është shkatërrim i trashëgimisë kulturore shqiptare.
Apolon Baçe theksoi se dhënia me koncension e Parkut të Butrintit është një skemë e pastër e përfitimit, në favor të një fondacioni, që protestuesit thanë se e drejton një antishqiptar.
