Teksa kanë mbetur tre ditë para finales së madhe të ligës së Konferencës që do të luhet në stadiumin “Air Albania” në Tiranë, trajneri i Romës, José Mourinho ka dhënë një mesazh për tifozët shqiptarë.
Në videon e publikuar nga kryeministri Edi Rama, në një konferencë për mediat Mourinho shprehet se është kënaqësi dyfish për të për të luajtur në Shqipëri pasi ka edhe miq në Tiranë.
Ai u kërkon tifozëve shqiptarë të bëjnë tifo për Romën, skuadrën ku bën pjesë lojtari shqiptar Marash Kumbulla ndërsa thotë se do të ishte bukur nëse Kumbulla ngre kupën në finalen e madhe.
“Finalja në Shqipëri për ne është kënaqësi, është kënaqësi për mua. Një kënaqësi dyfish. Kënaqësi që luaj në finale dhe kënaqësi që shkoj për herë të parë në një shtet të Europës ku nuk kam luajtur kurrë. Kënaqësi sepse kam edhe ndonjë mik në Tiranë në shoqërinë shqiptare dhe për Shqipërinë si vend. Mendoj se vende si Shqipëria e meritojnë këtë mundësi.
Ajo që pres nga tifozët shqiptarë është që me Kumbullën nëse nuk luan Kumbullën ai është e vetmja pikë lidhëse e Shqipërisë me finale. Ata duhet të jenë nga kjo anë. Dhe natyrisht do të jetë bukur nëse Kumbulla ngre kupën”, shprehet ai.
