Kryeqyteti do të hermetizohet! Kështu deklaroi kryebashkiaku i Tiranës, Erion Veliaj për masat që do të futen në fuqi ditën e nesërme në kuadër të finales së madhe të Conference League në Shqipëri. Tirana do të jetë e ‘blinduar’ njëjtë si dy vizitat e mëdha që kanë ndodhur në Tiranë, ajo e George Bush dhe Papa Françekut, tha Veliaj. Të gjithë personat që do duan të futen në Tiranë, duhet të jenë të pajisur me biletën e ndeshjes, në mënyrë që t’iu lejohet hyrja, shtoi ai.
Kryebashkiaku bëri të ditur se në terren do të ketë trupa të cilët do të jenë në mbikqyrje të situatës. Po ashtu, transporti publik do të vijojë punën si normalisht.
“Na duhen të gjitha trupat në terren, ka disa njerëz që nuk i përballojnë mirë emocionet, na duhen shumë trupa në terren, ata që dinë të komunikojnë se do ketë njerëz që do duan orientim. Ne kemi përgatitur 3 zona fansash, do të jetë qendra, sheshi ‘Skëndërbej’. Tifozët e Romës do të jenë te amfiteatri, ndërsa pjesa tjetër te Pedonalja e Tiranës. Do të jetë dita pa makina, transporti publik do të jetë në qarkullim. Mos e merrni rrugën për të ardhur në Tiranë, qyteti do të zbatojë protokollin që ndoqi në vizitën e Bush apo të Papa Françeskut. Qyteti do të hermetizohet. Pa një biletë për ndeshjen nuk futeni dot në Tiranë. Thirrja për të gjithë qytetarët, mos e merrni mundimin kot. Qytetarët e Tiranës të lëvizin sa më shumë në këmbë, sa më shumë me biçikleta”, deklaroi Veliaj.
Data 25 maj eshte caktuar me vendim qeverie dite pushimi zyrtar, por për te gjitha institucionet publike të qarkut te Tiranes. Edhe policia, doli ditë më parë me një plan masash në kuadër të finales së madhe të Conference League.
