Taulant Balla, kreu i grupit parlamentar socialist, ka reaguar ndaj deklaratave të deputetit demokrat Enkelejd Alibeaj, i cili sot akuyoi socialistët se kanë shkelur marrëveshjen lidhur me procesin e zgjedhjes së Presidentit të ri të Republikës.
“S’kemi rënë dakord që do firmosnin emrin e propozuar prej tyre për postin e Presidentit të Republikës”, shprehet Balla, duke shtuar se kandidati që do të garojë në raundin e 2 dhe të 3 do ketë vetëm firmat e opozitës.
Balla ka ftuar sërisht Alibeajn në tryezën e bisedimeve, duke shtuar se diskutimi është bërë në sytë e publikut dhe se nuk pasur dakordësi për formulën 4/2
“Rikthehuni në tryezë. Në asnjë rast, unë besoj se kohën e kemi për të mos e humbur raundin e dytë dhe besoj se dhe nesër mund ta shfrytëzojmë. Kandidati në raundin e dytë dhe të tretë do të duhet të ketë vetëm firmat mbështetëse të opozitës.
Pas raundit të tretë të kemi dhe ne të drejtën të propozojmë. Unë besoj se fryma e atij dokumenti mund të vlejë deri në raundin e tretë por me këto rregullime.
Mendoj se fakti që dhe grupet e tjera parlamentare kanë kuptuar të njëjtën gjë që kemi kuptuar dhe ne. Alibeaj paska kuptuar diçka tjetër, duhet të rishohim dhe njëherë diskutimin ne kemi qenë të qartë. Në kohë jemi unë jam këtu. Nëse vë kusht o një nga këto katër emra o s’ka atëherë ia ke hequr të drejtën palës tjetër”, tha ai.
Balla u shpreh se mazhoranca mbetet e hapur që të diskutojë kandidatët e propozuar nga opozita për raundet e dyta dhe të treta, nëse do të ketë të tillë.
Ai tha se përjashtim do të bëjnë vetëm ata kandidatët që do të mbështeten me firmën e Berishës, të cilët nuk do të merren në konsideratë.
“Edhe nëse PD vendos sot që nuk do të bëhet pjesë e këtij procesi, raundi i tretë do të jetë në datën 30. Kujtoj që kjo është kërkesë e opozitës. Nëse arrijmë të bëjmë bashkë të gjithë deputetët e opozitës, përveç firmës së njërit, pra nëse për një nga kandidatët ndodhet firma e Sali Berishës ne nuk e diskutojmë.
Unë besoj se procesi që kemi nisur edhe në grupet e tjera parlamentare duhet marrë në konsideratë përpjekja e tyre për të dalë me një kandidat të përbashkët.
Unë në fund të kësaj jave që filloi, ditën e hënë meqë është java amerikane, java e 100 vjetorit të marrëdhënieve me SHBA, jam shumë krenar që Kuvendi i Shqipërisë organizoi një konferencë me një personalitet të rëndësishëm siç është zoti Pompeu, i cili është dhe një kandidat potencial për zgjedhjet për president në vitin 2024.
Unë mendoj se SHBA-të meritojnë respektim më të thellë të popullit shqiptar”, tha Balla.
