Ish-kryeministri Sali Berisha ka komentuar në konferencën e sotme për mediat edhe emrat e kandidatëve për president të dala në mbledhjen e djeshme të Enkelejd Alibeajt me disa deputetë demokratë.
Berisha e cilësoi këtë proces një parodi e neveritshme dhe dëshmi tjetër e keqshfrytëzimit ekstrem nga Edi Rama të individëve të caktuar.
Duke iu referuar Alibeajt, Berisha tha se “çdo gjë që Edi Rama bën me Alibashën është një praktikë e denigrimit, e shpërfytyrimit dhe keqpërdorimit të një njeriu apo 2-3 njerëzve”.
“PD është forcë politike kryesore e opozitës dhe ajo funksionon mbi bazë procedurash, vendimesh dhe precedentësh. Gjithçka shihni ju janë një parodi e neveritshme, dëshmi tjetër e keqshfrytëzimit ekstrem nga Edi Rama të individëve të caktuar që për 1-3-5 arsye pranojnë të vetëposhtërohen nga Edi Rama, por që ata nuk përfaqësojnë asgjë nga PD. Ne bazuar në vendimet e forumeve të PD-së, por bazuar dhe në traditën dhe praktikën e mëparshme kemi bërë të qartë para jush qëndrimet tona. Çdo gjë që Edi Rama bën me Alibashën është një praktikë e denigrimit, e shpërfytyrimit dhe keqpërdorimit të një njeriu apo 2-3 njerëzve që një Zot e di se çfarë hallesh kanë dhe që ndodh siç e patë mbrëmë të përgënjeshtrohen flakë për flakë në studiot televizive për mashtrimet që kanë bërë. Pra, është një mjerim politik, megjithatë e kanë vetë përgjegjësinë”, deklaroi Berisha.
