Ish-kryeministri Sali Berisha u pyet nga gazetarët se çfarë mendimi ka në lidhje me emrat që kanë qarkulluar si kandidatura për President, të ish kryeprokurores Ina Rama dhe ish kreut të KED, Ardian Dvorani.
“Që të dy pa përjashtim janë subjekt ndjekjeje penale për veprimtarinë e tyre në detyrë”, tha Berisha në konferencën për media këtë të Shtunë.
“Ardian Dvorani ka fshehur 82 mijë euro. Ardian Dvorani ka kontratën e apartamentit për 92 m2 në një kohë kur na rezulton 128 m2. Dvorani ka deklaruar se Albtelecom i ka paguar 17 mijë euro të detyrimeve që ky kishte për apartamentin e tij e mbrapa Albtelecom, ky si kryegjyqtar ka dhënë 9 vendime kundër agjencive shtetërore në favor të Albtelecom privat për ti shpërblyet 17 mijë eurot. Ai është simboli më i nxirë i korrupsionit të gjyqësorit. Ina Rama mori pjesë aktive në pucin që dështoi më 21 janar. Ajo ndërmori një akt të dekapitimit të Gardës të zinxhirit të komandës me qëllimi e vetëm që dështimi i fazës së parë të kishte sukses në fazën e dytë, pra ka kryer veprimtari antikushtetuese që nuk parashkruhet kurrë. Këto janë komentet e mia për këtë zonjë e këtë zotëri”, shtoi Berisha.
