Rreth 22 deputetë demokratë, që iu përgjigjën një ftese nga Enkelejd Alibeaj për të diskutuar kandidaturat për President, pas më shumë se 3 orë mbledhje kanë konkluduar me një listë prej 8 emrash, që do të kalojnë në fazën e një diskutimi të thelluar.
Lista prej 8 emrash u përzgjodh nga 10 propozimet e bëra nga deputetë të ndryshëm të PD-së, në një takim që edhe pse u zhvillua në selinë e kësaj partie, nuk ka mbështetjen e Komisionit të Rithemelimit, që zyrtarisht përfaqëson dhe drejton këtë forcë politike.
Nga lista prej 10 emrash janë skualifikuar vetëm dy, Lajla Përnaska, ish-deputete, dhe Jorida Tabaku, deputete e PD.
Në listën e kandidatëve është edhe Princ Leka, sikundër janë edhe 3 ish-diplomatë, Leonard Demi, Visar Zhiti dhe Arben Çejku. Demi ka qenë deputet i PD vite më parë, më pas u emërua si diplomat, sikundër edhe Zhiti i cilishërbeu si ambasador në Vatikan, por më parë ka qenë deputet i PD.
Pas mbledhjes, Enkelejd Alibeaj tha se do të synohet përzgjedhja e një kandidature e cila do ti paraqitet socialistëve për raundin e 2 ose të 3-të, ku Presidenti zgjidhet me 84 vota.
Gjithsesi nga burime mësohet se në tryezën me Taulant Ballën, Elisa Spiropalin dhe Damian Gjiknuri, Alibeaj do të paraqesë më shumë se 1 kandidat, duke ia lënë në dorë socialistëve të skarcojnë emra, propozim ky që është bërë edhe më parë nga deputeti i PD.
Ajo që bie në sy nga mbledhja e sotme është se vetëm një kandidat është propozuar nga 3 deputetë, ndërsa emrat e tjerë janë propozime personale të ligjvënësve, ose një prej këtyre të fundit ka hedhur si propozim 2 apo 3 emra.
Kandidatët që kalojnë në diskutim të thelluar
1.Leonard Demi
2.Arben Çejku
3.Dritan Demiraj
4.Dashamir Shehi
5.Rexhep Uka
6.Halim Kosova
7.Leka Zogu
8.Visar Zhiti
Kandidatët që u propozuan në fillim
1.Leonard Demi
2.Arben Çejku
3.Dritan Demiraj
4.Dashamir Shehi
4.Jorida Tabaku
6.Rexhep Uka
7.Halim Kosova
8.Leka Zogu
9.Visar Zhiti
10.Lajla Pernaska
Deputetët që i kanë propozuar
Ferdinand Xhaferri propozon Leonard Demit
Flamur Hoxha, Zef Hila dhe Ramadan Lika propozojnë Arben Çejkun
Bledjon Nallbati propozon Dritan Demirajn
Kreshnik Çollaku propozon Dashamir Shehin, Lajlja Përnaskën dhe Jorida Tabakun
Sajmir Koreshi propozon Visar Zhitin
Xhelal Mziu propozon Dashamir Shehin, Rexhep Ukën dhe Halim Kosovën
Dhurata Çupi propozon Princ Lekën
