Zyrtarët e bashkisë Tiranë dhe të IMT janë marrë në pyetje nga SPAK për procedurat e ndjekura për shembjen dhe ndërtimin e shkollës “Sami Frashëri”. Mungesa e studimit të fizibilitetit dhe nisja e punimeve pa lejen e ndërtimit janë problemet kryesore të zbuluara që u justifikuan në dëshmi me nxitimin e rindërtimit. Nga ana tjetër zhvillimi i hetimeve ka shqetësuar dhe vetë Veliaj, i cili po ashtu ka atakuar prokurorët.
Zyrtarë të Drejtorisë së Urbanistikës pranë bashkisë Tiranë dhe Inspektoriatit të Mbrojtjes së Territorit të kësaj bashkie, janë vënë në hetim nga prokuroria e Posaçme SPAK, për procedurën e ndërtimit të shkollës “Sami Frashëri”.
Mësohet se ata janë nën akuzë për “Shpërdorimin e detyrës”.
Në verifikim janë procedurat tenderuese, por edhe ato të shembjes dhe rindërtimit të godinës.
Dosja në fakt ka disa kohë që rezulton e regjistruar, por për shkak të zhvillimeve dhe pyetjes së zyrtarëve, duket se ka ardhur edhe reagimi i politikës.
Ka qenë kryebashkiaku Erion Veliaj, i cili në dalje publike ka tentuar të sfumojë dhe ta paraqesë si banal hetimin duke akuzuar SPAK se po bllokon rindërtimin, duke zhvilluar hetime për një ËC, argument i përdorur më pas edhe nga Kryeministri.
Por çfarë po ndodh pas dyerve të Prokurorisë së Posaçme?
Hetimet kanë përparuar me pyetjen e disa prej zyrtarëve të zyrës së Urbanistikës në Bashkinë Tiranë, të cilët rezultojnë të mos kenë firmosur dhe prodhuar dokumenta për studimin e fizibilitetit dhe miratimin e lejes së ndërtimit të shkollës.
Gjatë marrjes në pyetje mësohet se ata kanë pranuar se nuk kanë nxjerrë dokumenta për këtë procedurë rindërtimi, duke i justifikuar se praktika kishte karakter urgjent, për shkak të dëmtimeve që kishte pësuar shkolla “Sami Frashëri” nga tërmeti i 26 nëntorit 2019.
Deri në këtë fazë ku ndodhet çështja, është arritur ti dilet në dyshime të qarta nga SPAK, se kjo procedurë rindërtimi që ka ndjekur bashkia Tiranë është tërësisht e paligjshme.
Të përfshirë në fashikull janë dhe zyrtarët e Inspektoriatit të Mbrojtjes të Territorit pranë bashkisë Tiranë.
Kreu i këtij institucioni dhe disa prej vartësve të tij, janë thirrur po ashtu për të dëshmuar.
Një nga dyshimet dhe provat e kërkuara ka qenë edhe leja e ndërtimit, e cila sipas një përgjigje të kthyer qendrës “Respublika” rezulton të jetë miratuar vetëm në mars të vitit 2022, pra kur objekti ishte në fazën finale të ndërtimit.
Por pavarësisht kësaj as IMT nuk ka reaguar shkolla e mesme e përgjithshme “Sami Frashëri”, u shemb në 24 prill 2020.
Punimet për rindërtimin nisën në vitin 2021, ku bashkimi i operatorëve,”Startek” shpk – “B93”shpk – “Riviera” shpk – “Duka” shpk – “Viante konstruksion” – “AL -Asfalt “shpk u shpallën fitues me ofertën prej rreth 4.5 milionë euro. /Oranews/
