Gjykata e Apelit kundër Krimit të Organizuar dhe Korrupsionit nuk ka marrë sot vendim për Lefter Kokën, i cili kishte kërkuar një masë më të butë sigurie.
Ndaj ish-ministrit të Mjedisit rëndojnë tre akuza, ajo e “Korrupsionit”, “shpërdorimit të detyrës” dhe ajo e pastrimit të parave”. Lefter Koka u arrestua më 14 dhjetor me urdhër të SPAK për çështjen e inceneratorit të Elbasanit, pasi akuzhohet për korrupsion dhe shpërdorim detyre.
Sipas prokurorisë, ministria e Mjedisit nën drejtimin e Kokës nuk ka kryer veprimet e plota përgatitore për dhënien e koncensionit. Ankimimi për masë më të butë është bërë me pretendimin se ai nuk ka përgjegjësi për shpronësimin, pasi dokumentacioni është paraqitur nga ekspertët e ministrisë së mjedisit.
Më pas, ai është akuzuar edhe për inceneratorin e Fierit.
SPAK pretendon se Koka ka përfituar përmes ryshfetit 1.2 milionë euro për ndërtimin e inceneratorit të Fierit, e për këtë shkalla e parë ka caktuar masën sigurisë “arrest me burg”. Koka akuzohet edhe për inceneratorin e Elbasanit, që sipas prokurorisë, ish-ministri ka marrë ryshfet 3.7 mln euro për ndërtimin e tij.
Në një deklaratë për gazetarët këtë të Martë, avokati i Kokës mohoi se klienti i tij është kthyer në të penduar të drejtësisë.
“Ai ka qenë i hapur ndaj procesit, nuk ka për çfarë të pendohet”, tha avokati.
