SPAK ka nisur një hetim ndaj Kryebashkiakut të Tiranës, Erion Veliaj, lidhur me shkollën “Sami Frashëri”, e cila u shemb me pretendimin se ishte dëmtuar nga tërmeti dhe u rindërtua.
Njoftimin që SPAK po heton e ka dhënë vetë Kryebashkiaku, i cili nuk ka nguruar të tallet me prokurorët e Prokurorisë Speciale.
Në një intervistë për “Top Story” nga Nju Jorku, Veliaj u shpreh se SPAK është duke hetuar murin ndarës midis shkollës “Sami Frashëri” dhe teqes dhe një wc të bërë aty provizorisht për të ngulur një gozhdë.
“Nuk kam përfitim personal nga Sami Frashëri se unë nuk jetoj aty, nuk kam shtuar kat dhe nuk jam më student. Nuk kam konflikt interesi dhe këtë konkluzion do të arrijë edhe SPAK. Ajo WC nuk është më fizikisht aty dhe kur shikon si i ka ngritur opozita këto, nuk është shtëpi private është e bashkisë. Gjasat janë që do mbyllen se nuk ka abuzime. Këtu prevalon interesi publik”, tha Erion Veliaj.
I pyetur nga Sokol Balla nëse do ishte i shqetësuar po të dilte para drejtësisë për hetim, Veliaj thotë se nuk kishte asnjë problem në lidhje me këtë gjë dhe se ky do të ishte një fakt që Rama nuk mbështet zyrtarët e partisë së tij por i trajton ata të barabartë me të tjerët, edhe para drejtësisë.
“Nuk shqetësohem fare që të dal para drejtësisë. Në qoftë se një kryebashkiak nuk përgjigjet në kohë ndaj shërbimit ndaj qytetarëve qartazi nuk është për atë vend. Secili i bën hyzmet punës së vet. Në këtë rast kjo është prova që kryeministri nuk do që të mbrojë të vetët”, tha Veliaj.
