Kuvendi i Shqipërisë konsumoi pasditen e sotme raundin e parë të zgjedhjes së Presidentit, pa pasur një kandidaturë, ndërsa janë edhe 4 raunde të tjera, bazuar në Kushtetutën e vendit.
Ish-ministri Besnik Mustafaj në një intervistë në “Radari Informativ” në Abc, u shpreh se kjo situatë rrezikon të ndodhë edhe në seancën e dytë dhe të tretë, pra të dilet pa një emër kandidati.
“Pa një kandidaturë përse do të diskutohej seanca. Aq më tepër nuk mund të votohej. Por pse erdhëm te një situatë të tillë e cila ka rrezik të jetë edhe në seancën e dytë edhe në seancën e tretë. Nuk ka garë, është një lloj mirëbesimi që ja jep Parlamentin një personaliteti të caktuar. Po të kishte garë do të ishte ndryshe”, tha Mustafaj.
Analisti shtoi se që të shkohet te emri i Presidentit, duhet më parë të arrihet një marrëveshje mes grupeve parlamentare. Por që të arrihet në një marrëveshje, në gjykimin e Mustafajt, PD duhet të arrijë një konsensus të brendshëm.
“Nuk shkohet te emri pa u arritur më parë një marrëveshje. Mazhoranca dhe opozita duhet të diskutojë mes tyre dhe të arrijnë të një emër që plotëson kriteret. E ndershme dhe serioze dhe që do të tregonte se ka një përpjekje reale nga mazhoranca për të arritur të një President konsensual do të ishte prezantimi i identikitit. Edi Rama nuk po i krijon kushtet që ata të flasin për Presidentin. Opozita është e domosdoshme të ketë një qëndrim të përbashkët vetë lidhur me kriteret. Duhet patjetër një punë e brendshme. Në këtë drejtim të dyja palët po ecin në rrugën e gabuar për të arritur në një president konsensual. Mundësit ekzistojnë, por vullneti nuk e di. Nuk e shoh këtë vullnet në radhë të parë te mazhoranca. Ka një humbje kohe që nuk është në frymën e Kushtetutës”, tha ai.
