Ish-Sekretari amerikan i Shtetit, Mike Pompeo, zhvilloi një vizitë në Tiranë, ku mori pjesë në disa evente.
Takimet apo fotot me disa nga të pranishmit në eventet ku ishte i pranishëm Pompeo shkaktuan polemika, kjo për faktin se në një nga fotot ai u shfaq me Enkelejd Alibeajn dhe disa nga deputetët e PD, të cilët janë kundër Rithemelimit ku bën pjesë ish-Kryeministri Sali Berisha.
Ndërkohë që u hodhën shumë insinuata lidhur me vizitën dhe fotot, ish-Sekretari amerikan i Shtetit, përmes rrjeteve sociale ka sqaruar vizitën e tij në Shqipëri. Ai shkruan se erdhi për të folur me komunitetin iranian të vendosur në Manzë.
“Udhëtova sot në Shqipëri për të folur me komunitetin iranian atje. Ata kanë të drejtë t’i rezistojnë mullahëve dhe të punojnë për të ofruar atë për të cilën populli iranian po kërkon dhe po proteston: çlirimin e qytetarëve të Iranit nga zgjedha tiranike e regjimit”, shkruan Pompeo.
