Nga Boldnews.al
Ardit Kërtusha i shpëtoi fatmirësisht një atentati të mirëorganizuar në Durrës, në një ngjarje që policia u mundua ta minimizojë si një konflikt të çastit.
Mesditën e kësaj të Hëne, Kërtusha, ish-kandidat për drejtues të Partisë Socialiste në qytetin bregdetar dhe një personazh i jetës publike në Durrës, u raportua se ishte plagosur në këmbë.
Policia e Shtetit njoftoi se ai u plagos në lokalin “Zins” në pronësi të këngëtarit Noizy, pas “një konflikti të çastit”.
Por, “Boldnews.al” ka mësuar dinamikën e detajuar të ngjarjes dhe duket se ndaj Kërtueshës është organizuar një atentat i pastër dhe nuk ka pasur lidhje me “motive të çastit”.
Sipas të dhënave të siguruara nga redaksia, rezulton se 31-vjeçari Kërtusha dhe një miku i tij kanë qenë ulur në lokalin e Noizyt, rreth mesditës së të Hënës (16.05.2022).
Nga jashtë lokalit ka ardhur një djalë i ri, i cili mbante në fytyrë një maskë anti-covid, me syze të errëta dhe kapele në kokë.
Sapo është afruar tek tavolina ku gjendej Kërtusha, atentatori ka nxjerrë një pistoletë, për të qëlluar në drejtim të Kërtushës.
Por, pistoleta është bllokuar pasi ka qëlluar vetëm 1 herë, ndërsa atentatori ka futur dorën në një çantë që mbante me vete, nga ku ka nxjerrë një pistoletë të dytë.
Ndërkohë, Ardit Kërtusha, sapo ka parë që pistoleta e parë u bllokua, vrapoi me shpejtësi mes tavolinave.
Atentatori e ka ndjekur Kërtushën, duke e qëlluar edhe të paktën dy herë të tjera. Një prej plumbave e ka kapur objektivin në këmbë, ndërkohë që autori është larguar me shpejtësi, pasi dështoi me planin e tij.
E gjithë skena është parë nga persona që gjendeshin në atë moment në lokal, si edhe nga kamerat e sigurisë së ambjentit.
Është e paqartë se përse Policia e Durrësit nxitoi të shpërndante një mjegullnajë për dinamikën e ngjarjes, duke e konsideruar si një “konflikt të çastit”.
Ardit Kërtusha është një personazh i njohur i jetës politike në Durrës. Ai ka qenë kryetar i Forumit Euro-socialist Shqiptar (FRESH) për disa vite, ndërkohë që pak kohë më parë kandidoi për kryetar të Partisë Socialiste në Durrës.
Pas përplasjeve politike brenda socialistëve, Kërtusha u bashkua me forcat opozitare të drejtuara nga Lulzim Basha.
Ardit Kërtusha ka akuzuar publikisht zyrtarë e ish-zyrtarë të rëndësishëm socialistë për abuzim me pushtetin.
Për këto arsye, ai ka marrë edhe kërcënime dhe për të cilat ka dorëzuar kallëzime penale në prokurorinë e qytetit.
