Ish-Kryeministri Sali Berisha ka nisur takimin me demokratët e Shkodrës, të cilët i falenderoi për mbështetjen që i dhanë lëvizjes së nisur për rithemelimin e Partisë Demokratike, duke mos pranuar kallp opozitën.
Berisha tha se shqiptarët janë një komb që kanë vuajtur nga diktaturat dhe autokracitë më të egra, ndaj dhe ato treguan përpjekje epike kundër autokracisë dhe kallp opozitës.
“Një qeveri e cila disponon mjete të jashtëzakonshme të paligjshme, një qeveri në dhunim të standardeve dhe normave demokratike ka vendosur të çimentojë pushtetin e saj, një pseudo-opozitë që është shndërruar në freskore të Qeverisë u angazhua në lojrat e saj, një drejtësi e kontrolluar tërësisht nga Qeveria u vu në shërbim të goditjes së opozitës së vërtetë.
Por në goditjet kundër PD-së u mobolizua edhe mafia e George Soros, e cila është mafia politike më e rrezikshme e planetit.
Por demokratët, pavarësisht nga shantazhet, presionet dhe kërcënimet, këtu në Shkodër i qëndruan besnik idealeve të tyre, dhe votuan midis opozitës së vërtetë, pseudo-opozitës dhe PS-së, kandidatin Bardh Spahia”, tha Berisha.
Ai theksoi se PD ka kaluar momente shumë kritike, por vota juaj e 6 marsit ishte shpëtimtare për Partinë Demokratike.
