Ish-Kryeministri Sali Berisha, gjatë takimit me demokratët e Fierit, tha se beteja që u zhvillua ishte mes demokratikes dhe autokratikes.
Berisha tha se ish-Kryetari i PD, shkelmoi statutin e partisë, vullnetin e anëtarësisë, madje edhe ligjet e vendit, duke marrë vendime autokratike, anti-demokratike.
Ish-Kryeministri Berisha u shpreh se Lulzim Basha lëshonte komunikata se kush përjashtohej e kush jo, ndërsa ne u ngritëm kundër këtij arbitrariteti, ilegjitimiteti, dhe çdo gjë që bëmë deri sot e bazuam te vota e lirë.
“Nëse nuk do të ishim parti e votës së lirë, ne do të ishim fatkeqësi kombëtare. Çfarë bëmë ne, shkelmuam lirinë brenda vetes tonë”, tha Berisha.
Ai shtoi se PD po shkonte sipas modelit të PS-së, ku është asgjesuar vota e lirë. “Ne arritëm të rikthejmë votën me procesin që nisëm për rithemelimin, por kam një kërkesë për demokratët: ju duhet të kontribuoni me votë, dhe çdo dyshim që keni për votën duhet të tregoheni zero tolerantë, të kërkoni verifikimin”, tha Berisha.
Referuar zgjedhjes së anëtarëve të Këshillit Kombëtar, Berisha tha se ka pasur një seri ankesash dhe përgjigjia që i kam dhënë ishte: kërko rinumërimin e votave, askush nuk duhet të ketë ndrojtje në këtë kërkesë.
Berisha tha se në këtë proces për rikthimin e votës demokratët kishin kundër establishmentin, por edhe një pjesë të opozitës fasadë, e cila na u kundërvu me gjykatat.
“Brenda 3-4 javësh ka filluar të ndjehet opozita e vërtetë, por një PD opozitë e vërtetë, është dhe duhet të jetë një mjet për të shpëtuar Shqipërinë, nga kjo situatë absolutisht më e vështira”, tha Berisha. Sipas tij, gjërat po lëvizin në kundërshtim me interesat tona, interesat kombëtare.
