Ish-Kryeministri Sali Berisha ka dënuar sërish votën kundër të Edi Ramës dhe deputetëve të PS, ndaj rezolutës që dënonte gjenocidin serb në Srebrenicë të Bosnje Hercegovinës.
Nga Fieri ku zhvilloi takimin me demokratët, Berisha e quajti Ramën vasal dhe u shpreh se kryeministri shkelmoi interesin kombëtar, ndërsa i kujtoi edhe krimet serbe ndaj popullsisë shqiptare në Kosovë.
“Në mënyrën më të paimagjinueshme, deputetët e PS votojnë kundër dënimit të gjenocidit në Bosnje. Ai turp na ka rënë edhe ne, të jeni të sigurt.
E kuptoni se çfarë do të thotë kjo? Çfarë kombi qenkan këta shqiptarët? Si ka mundësi të ndodhë kjo? Ata e votuan, por problemi është se turpi iu mbetet të gjithë shqiptarëve dhe i madh. Ministrja e Jashtme çonte kartonin. Pse e pranon ti gjenocidin serb që e voton kundër?
Ky është akt primitiv, ky është akt vasaliteti i plotë, shklelmon totalisht në radhë të parë interesin tënd kombëtar, në radhë të dytë shkelmon mbi kombin tënd si komb i qytetëruar, por kombet e qytetëruara nuk pranojnë kurrë gjenocide.
Por ti shkelmon edhe mbi ato viktima të Bosnjes dhe që janë më shumë në Kosovë shqiptarë po t’i marrësh nga 1874 e gjer në 1999”, u shpreh Berisha.
