Gjatë raportimit vjetor përpara KLP-së, drejtuesi i Prokurorisë së Posaçme (SPAK), Arben Kraja, u pyet nëse institucioni që ai drejton ndihet nën presion nga retorika politike e ditëve të fundit.
“Të gjithë prokurorët dhe BKH janë të ndërgjegjshëm që punojnë në institucionin më të rëndësishëm. Pa diskutim do të ketë opinione, do të ketë presione. Janë jashtë nesh të gjitha. E rëndësishme për ne është të jemi korrekt me zbatimin e ligjit. Kemi bërë një mbledhje. I kam thënë gjithë trupës: vazhdoni punën, vlerësoni provat”, tha Kraja.
Deklaratat e Krajës vijnë një ditë pas konferencës së gjatë për shtyp ku kryeministri Edi Rama foli gjatë për Reformën në Drejtësi dhe theksoi se askush nuk ia heq dot të drejtën për të dhënë mendimin e tij “për punët e drejtësisë së re”.
“Si njeriu që është sulmuar më shumë për këtë reformë, jo vetëm nga kundërshtarët, por edhe mbështetësit e tij, unë besoj që të drejtën për të ndarë mendimin tim për punët e drejtësisë së re, nuk ma heq askush. Kujtoj se i kemi mbështetur të gjitha veprimet dhe vendimet e SPAK-ut, pa ekuivok dhe pa komente; kujtoj se e kemi bërë të qartë qysh në krye të herës se për ne nuk ka të paprekshëm dhe se çdokush në radhët tona, që me drejtësinë ka llogari të hapur, derën e kësaj partie e ka të mbyllur; kujtoj gjithashtu se nëse sot, ish-ministra, ish-deputetë apo ish-kryebashkiakë që tani janë prapa hekurave, ky është vetëm rezultat i një fakti shumë kokëfortë, që është se as unë dhe askush nga ne, nuk jemi angazhuar në rrugën e kësaj reforme për ta përdorur politikisht drejtësinë dhe as për të sulmuar politikisht kundërshtarët politikë, siç ka ndodhur gjatë gjithë historisë”, deklaroi Rama.
Raportimi në KLP
“Politika ka ngritur retorikën për anshmëri, a ndiheni të presionuar? SPAK dhe BKH nuk janë në sinkron, çfarë nuk shkon”, u pyet Kraja nga drejtuesi i KLP-së Alfred Balla.
Kreu i SPAK iu përgjigj: Të gjithë prokurorët e hetuesit janë të ndërgjegjshëm kë hetojmë, e dimë që do ketë opinione të ndryshme, presione. E rëndësishme për ne të jemi korrekt me ligjin, të vlerësojmë provat. Këto u kam thënë edhe prokurorëve, të vijojnë punët me provat, nuk është problem shqetësues për ne. Në lidhje me pyetjen e dytë, unë mendoj se ne punojmë në koherencë me BKH. Oficerët janë të rinj, por po mësojnë.
Bujar Sheshi: I kanë përmbushur pritshmëritë hetuesit e BKH? A janë zbatuar të gjitha procedurat nga prokurorët për hetimet penale?
Arben Kraja: BKH është trup e pavarur në funksion të SPAK. Ideja është për një institucion të përbashkët që bën një produkt. Hap pas hapi jemi munduar ta konsoludojmë. Te zgjedhja e personelit na është dashur shumë punë, energji. Janë me vullnet të jashtëzakonshëm për të punuar. Nga ana profesionale akoma nuk janë aty ku do të donim, pasi vijnë nga fusha të tjera. Por me rëndësi për mua është që kanë vullnetin, do shtohet nurmi i tyre, trajnimet, mbështetja e prokurorëve. Kemi problem ambientet, por numri i madh në organik e bën të pamundur qëndrimin. Presim të marrim një objekt diku aty afër për të sistemuar të gjithë. Kemi ngritur një komision mbikëqyrës për BKH.
Krajës, pas raportimit në KLP, iu kërkua nga gazetarët një koment lidhur me deklaratat e kryeministrit Edi Rama për SPAK.
“S’kam koment”, tha shkurtimisht Kraja.
I pyetur nëse “ndiheni të intimiduar”, Kraja sërish u përgjigj shkurtimisht: Jo.
