Deputeti i Partisë Demokratike, Belind Këlliçi ka reaguar pas sulmeve që kryeministri Rama i bëri SPAK në Asamblenë e PS. Në një dalje për mediat, nga selia blu, deputeti Këlliçi u shpreh se Ramën e ka kapur paniku.
Këlliçi deklaroi se nuk ka hallin e drejtësisë, por hallin e tij personal dhe karriges së tij, të cilin po e mban me presion. Më tej deputeti u shpreh se ka informacione të besueshme rreth disa hetimeve ndërkombëtare rreth personit të tij.
“Kush ka dëgjuar Ramën të sulmojë SPAK e kupton hallin e tij dhe të qeverisë së korruptuar që e drejton prej me shumë se 9 vjetësh. Klithmat e Ramës më shpëtoni nga Berisha tregojnë panikun që e ka kapur dhe gjendjen e tij të pashpresë. Sulmi i përsëritur i Ramës kundër SPAK ka të bëjë me Edi Ramën dhe të korruptuarit që e rrethojnë atë. Kjo edhe në bazë të një sërë informacionesh të besueshme në lidhje me disa hetime ndërkombëtare rreth personit të tij. Sulmi i tij është mesazhi i koduar ndaj SPAK që SPAK të tërhiqet me çështje që prekin Ramën dhe njerëz të afërt të tij”, tha ndër të tjera Kelliçi.
Deputeti demokrat u shpreh se kohës së Edi Ramës i ka ardhur fundi dhe se sot sulmoi SPAK-un për hallet e tij.
“Kohës së Edi Ramës i ka ardhur tashmë fundi. Ai kryeministër që kyç gojën, kur trafikantët përmendin një ministër të tij, ndërkohë që sulmon SPAK, do të thotë se ai nuk ka hallin e drejtësisë, por karriges së tij. I vetmi turp i SPAK-ut do të ishte nëse i nënshtrohet dhunës së kryeministrit”, tha Këlliçi.
