Për të dytën ditë radazhi, banorët që jetojnë pranë rrugës së Rinasit kanë dalë në protestë duke bllokuar aksin.
Ato protestuan rreth dy orë kundër vendimit të ARRSH-së për kalimin me një sens.
”Nuk mund të na izolojnë fshatin. Nëse ke një të sëmurë më parë duhet të shkosh në Shkodër pastaj ta çosh në spital. Qendra administrative Nikël është inekzistente”, tha një prej banorëve.
Mes banorëve dhe policisë pati momente tensione, kur efektivët shtynë protestuesit për të liruar qarkullimin e mjeteve në rrugë.
Banorët lajmëruan se do protestat do të vijojnë nëse qarkullimi në rrugën e Rinasit nuk rikthehet me dy sense lëvizje.
“Nëse nuk hapet rruga deri nesër, s’do çojmë fëmijët në shkollë dhe do bllokojmë aeroportin ‘Nënë Tereza’. Ne kemi të drejtë që të udhëtojmë. U bëj thirrje komunitetit të ruajmë qetësinë. Në krahun tjetër i bëj thirrje qeverisë se kërkesat tona janë legjitime dhe të drejta, është problem i yni jetik. Ne do të vendosim sanksione. Nga nesër nëse nuk do të hapet rruga, nuk do të lejojmë fëmijët që të shkojnë në shkollë. Të gjithë banorët kanë të drejtën legjitime të bllokojnë dhe aeroportin e Rinasit. Kërkojmë shkollën, ambulancën dhe tokën bujqësore. Me atë tokë jetojmë, ajo del jashtë përdorimit, çdo gjë”, tha një tjetër.
“Për të dalë për të blerë një bukë, duhet të bëj 25 km. Duhet të iki në Fushë-Krujë, se s’kam nga dal. Të vijë ambulanca, s’ka ku futet. Nuk kam zgjidhje, jam në burg me ajrim. S’kemi si e bëjmë ndryshe. Fëmijët nuk kanë nga ikin për në shkollë. Jemi një nga fshatrat më të rregullt, s’kemi pasur probleme as në 97-ën. S’kemi as ujë as drita. Sa të bjerë një pikë shi, ikin dritat, jemi të penalizuar. Jemi 690 votues, plus fëmijë. S’po kërkojmë asgjë tjetër, kërkojmë vetëm lëvizje brenda fshatit”, u shpreh një tjetër protestuesi.
Duke filluar nga data 1 Maj e këtij viti, të gjithë ata që udhëtojnë drejt aeroportit të Rinasit duhet të ndjekin udhëzimet më të reja që ka bërë publike nga Autoriteti Rrugor Shqiptar. ARRSH ka vendosur që për një afat të pacaktuar lëvizja drejt aeroportit të realizohet me një sens lëvizje me drejtimin nga Qafë Kashari-Rrethrrotullimi i “Nënë Terezës”-Ahmetaq. Arsyetimi i autoritetit për vendimin është se në rrugën që të çon drejt Aeroportit të Rinasit, pas periudhës së Covid 19, është rritur edhe fluksi i fluturimeve, si pasojë edhe qarkullimi i mjeteve, duke sjellë probleme për udhëtarët për të kapur linjat e fluturimeve në orarin e caktuar.
Lexo edhe:
