Napoli është rikthyer te fitorja dhe e ka bërë atë në mënyrën më bindëse të mundshme. Në javën e 35-të ekipi i Spallettit ka mposhtur me rezultatin tenistik 6-1 Sassuolon, ndërsa në festivalin e golave festoi edhe mbrojtësi Amir Rrahamani që realizoi golin e gjashtë të këtij takimi.
Napoli i mbylli llogaritë në këtë takim që në 21 minutat e para pasi arriti të realizonte 4 gola të shpejtë. Dy golat e parë erdhën nga goditjet e këndit ndërsa Koulibaly e më pas Osimhen i dhanë epërsinë e dyfishtë.
Lozano realizoi golin e tretë ndërsa pokeri u plotësua nga Dries Mertens. Ky i fundit shënoi edhe një dygolësh në këtë takim, pasi në minutën e 54-t arriti të çonte shifrat në 5-0.
Vend në festën e Napolit kishte edhe për Amir Rrahmanin që shënoi golin e gjashtë në këtë takim, ndërsa goli i nderit për Sassuolon u shënua nga Lopez. Me këtë fitore Napoli ngjitet në kutëon e 70 pikëve dhe nëse beson ende te titulli, po shpreson për hapat fals të Interit dhe Milanit.
Në sfidën tjetër Cagliari vazhdon të rrezikojë qëndrimin në elitën e futbollit italian pasi u mposht në shtëpi nga Hellas Verona me rezultatin e ngushtë 2-1. Ndeshja ishte e balancuar, por ekuilibrat u prishën në minutën e tetë nga Barak i cili i çoi shifrat në 1-0.
Verona do të dyfishonte po brenda pjesës së parë, këtë herë në fundin e fraksionit me Caprarin. Sulmuesi italian e ndali topin në rrjetë duke i çuar ekipet në dhomat e zhveshjes në epërsinë e dyfishtë të Veronës.
Cagliari u përpoq të ndryshonte diçka në pjesën e dytë dhe gjeti golin në minutën e 57-të me Joao Pedro. Ky ishte dhe goli që vulosi rezultatin, ndërsa ekipet nuk gjetën dot forcë më tepër për të reaguar. Kështu, Cagliari qëndron në kuotën e 28 pikëve, tre pikë më shumë se zona e ftohtë që të çon një kategori më poshtë.
