Sirio Berati një artist vizual/dixhital është shqiptari që mbajti një fjalim në Samitin e Forbes “Under 30” në Ohio mbi Inteligjencën Artificiale, Kreativitetin dhe Biznesin, ku rrëfeu se si po ndërton një startup nga e para, me 0$ në bankë, 3 anëtarë ekipi, pa aftësi kodimi dhe pa fonde VC.
Në një postim në rrjetet sociale, Sirio Berati ka rikujtuar se gjatë fjalimit të tij në eventin prestigjioz dha një deklaratë që tërhoqi vëmendjen e të gjithëve:
“Deri në vitin 2027, miliarderët e ardhshëm do të jenë krijuesit. Dhe unë do të përpiqem ta provoj këtë.”
Vetëm katër muaj më parë, siç rrëfen ai vetë, bota nuk besonte në vizionin e tij. Por sot, Sirio Berati drejton një nga startup-et e inteligjencës artificiale që po rritet më shpejt në botë, pa investime të jashtme, pa reklama, vetëm përmes komunitetit dhe kreativitetit të pastër.
“Nuk jam këtu sepse kisha një plan perfekt. Unë as nuk mbaj lista me detyra. Jeta ime është kaotike. Por mësova të kombinoj gjithçka që di: dizajn, tregim, teknologji, emocion dhe ta kthej në diçka që funksionon. Kjo është ajo që do të thotë të jesh krijues.”
Sipas tij, krijuesit janë “GPT-të origjinale”, njerëz që nuk mësojnë thjesht, por përziejnë, përshtatin dhe imagjinojnë. Dhe kur një person i tillë merr akses në inteligjencën artificiale, “atëherë ndodh magjia e vërtetë”.
Sirio Berati nuk harron të falënderojë ata që e kanë mbështetur në rrugëtimin e tij:
“Asgjë nga kjo nuk do të ekzistonte pa njerëzit që besuan, ndërtuan dhe eksperimentuan me mua. Ju faleminderit.”
Në fund, ai ndan edhe një këshillë për të gjithë të rinjtë dhe krijuesit që duan të bëjnë ndryshimin:
“Përdorni inteligjencën artificiale për të ndërtuar idenë më absurde që keni pasur ndonjëherë, por që nuk keni pasur mundësi ta realizoni. Sepse magjia e vërtetë e AI-së nuk është çfarë mund të bëjë për ju, por si ju fuqizon të bëni atë që keni dashur gjithmonë. Krijoni, pa kufij.”
