Kategoria e Parë ka mbyllur ndeshjet e javës së 29-të të saj, teksa janë shënuar “lumë” golash ditën e sotme.
Në sfidën mes Bylisit dhe Butrintit të luajtur në “Adush Muça” janë shënuar plot 7 gola, me vendasit që arritën të marrin një tjetër fitore që tashmë shpallen kampionë të Kategorisë së Parë, pasi mposhtën 4-3 skuadrën e Butrintit, duke mos i dhënë asnjë mundësi miqve për të shpresuar tek mbijetesa. 4 golat për skuadrën e Bylisit arriti ti shënonte Qardaku 4’, 6’ 49’ dhe 76’, ndërsa për sarandiotët shënuanBuxhelaj 33’, Unuh 46’ dhe 66’.
Fitore mori edhe Erzeni që mposhti 4-1 skuadrën e Vorës, një 3 pikësh që i jep të drejtën skuadrës shijakase të jetë mes skuadrave më të mira të superligës sezonin e ardhshëm, pasi kur ka mbetur edhe një ndeshje për t’u luajtur, Erzeni ka siguruar edhe matematikisht ngjitjen në Superligë sezonin e ardhëm.
Korabi po ashtu nuk fali ndaj Maliqit që arriti të fitonte minimalisht 1-0, ku golin e fitores arriti ta shënonte Mziu 21’. Apolonia është surprizuar në transfertë nga Lushnja, teksa janë mposhtur 1-0. Golin e vetëm të sfidës e shënoi Canka 55’.
Po me rezultatin 1-0 u mposht edhe Tërbuni nga skuadra e Pogradecit, teksa pogradecarët i falen Brahjas për golin e fitores që u shënua në minutën e 10-të të takimit. Me këtë fitore Pogradeci mban gjallë shpresat për mbijetesën në Kategorinë e Parë.
Turbina fiton në shtëpi me shifrat 4-3 përballë Tomorit, ku ky i fundit rrezikon edhe zonën “Play-Off”, pasi Burreli arriti të fitonte përballë Shkumbinit me shifrat 2-0, ndërsa është vetëm 2 pikë larg Tomorit që ndodhet në zonën e “Play-offit”.
Ndërkohë në duelin direkt për mbijetesën Besëlidhja ka arritur të mposhtë Besën me shifrat 2-1.
