Që prej mbrëmjes së kaluar, policia ka nisur një operacion në qytetin e Lezhës. Raportohet se po ekzekutohen vendimet e Apelit të GJKKO për personat e dënuar për tjetërsimin e pronave në Shëngjin. Deri tani janë ndaluar të paktën dy persona, emrat e të cilëve nuk bëhen me dije.
Më herët, është konfiskuar një pasuri me vlerë 55 milionë euro, për grupin i cili tjetërsoi pronat në bregdetin e Shëngjinit.
Bëhet fjalë për rreth 300 mijë metra katror, në 75 pasuri të ndryshme. Vendimi i marrë nga Gjykata kundër Korrupsionit dhe Krimit të Organizuar u ndryshua nga Apeli ndërkohë që janë rritur dënimet me burg për të gjithë fajtorët. Apeli shtoi me 18 vite burg dënimet në tërësi, nga 30 vite në 48 vite. Mes te dënuarve me burg është edhe Xhevi Ndoka dhe Mimoza Ndoka, të cilët janë përkatësisht vëllai dhe motra e ish-deputetit të Partisë Socialiste në Lezhë, Arben Ndoka.
