Kolegji i Posaçëm i Apelimit njoftoi këtë të Mërkurë vendimin unanim të shkarkimit nga detyra të drejtueses së Prokurorisë së Tiranës, Elisabeta Imeraj.
Në Prill 2021, Imeraj u konfirmua në detyrë nga KPK. Vendimi u ankimua në KPA nga Komisioneri Publik, me rekomandim të ONM-së. Kërkesa e Bordit të Operacionit Ndërkombëtar të Monitorimit për shkarkimin e Imerajt u mbështet dhe nga ambasadorja amerikane Yuri Kim.
“Të gjithë duhet të ndjekim nga afër se çfarë do ndodhë më pas. Përgjigjja do të jetë shfaqje guximi e integriteti në dhënien e drejtësisë apo, siç kemi parë shumë shpesh në të kaluarën, shmangie e përpjekjeve, duke sulmuar procesin e vetingut dhe përfolur vëzhguesit ndërkombëtarë,” u shpreh ambasadorja Kim përmes një postimi në rrjetet sociale.
Çështja kaloi më pas në KPA, ku palët parashtruan kërkesat dhe argumentet e tyre.
Vetë prokurorja Elizabeta Imeraj ka ngritur dyshime për influencë ndaj trupës gjykuese për shkarkimin e saj nga detyra.
Po ashtu, Imeraj ka deklaruar se është paragjykuar për shkak të origjinës së saj nga Tropoja dhe është quajtur “maloke” nga komisionerja e shkallës të parë së vetingut Genta Bungo.
Pas disa seancave, këtë të Mërkurë, trupa gjykuese e KPA shprehu vendimin për shkarkimin e Imerajt.
