Nga Boldnews.al
Në kulmin e debateve mes kryeministrit Edi Rama dhe deputetes së PD-së, Jorida Tabaku, se uji i çezmave është i pijshëm, Lali Eri vijonte “i qetë” procedurat e tenderit që kishte nisur.
Pak ditë më parë, Boldnews.al, denoncoi se Bashkia e Tiranës hapi tenderin me vlerë 25 mijë USD për të blerë ujë të pijshëm për punonjësit e bashkisë.
Një paradoks i madh, në një kohë kur në Tiranë janë investuar qindra milionë euro për Ujësjellësat, apo edhe tubacionet. Por, ky ishte “autogoli” i dytë, pasi më parë Lali Eri do të deklaronte se “sapo bleva në market ujë të pijshëm për shtëpinë”. Dhe, vijmë në këto kohë, kur kryeministri ynë gjatosh “mburret” se ka bërë investime në ujësjellësa dhe mbush gotën në rubinetin e ccezmës, në të cilën mund të ketë vendosur edhe filtra.
Përtej debateve shterpë, ata më të dëmtuarit e kësaj historie janë taksapaguesit, të cilët blejnë ujë të pijshëm në markete, paguajnë edhe ujin që u vjen në çezma, me tarifa dhe fatura të fryra. Dhe me taksat e tyre po paguajnë edhe ujin e pijshëm të punonjësve të Bashkisë së Tiranës.
Sipas dokumenteve që disponon Boldnews.al, në datën 19 prill 2022, Bashkia e Tiranës njoftoi APP-në se kishte shpallur fituesin e tenderit me objekt “blerje ujë i pijshëm, për punonjësit e Bashkisë Tiranë për vitin 2022″.
Para pak ditësh, Boldnews.al publikoi dokumentet kur bashkia kishte bërë njoftimin në Agjencinë e Prokurimit Publik, teksa procedura ishte e hapur dhe e thjeshtuar. Fondi limit ishte 2.249.925 lekë pa TVSH, ose me TVSH shuma shkon në rreth 25 mijë USD, ndërsa kohëzgjatja e kontratës ose afati për zbatimin e saj është nga data e lidhjes së kontratës deri në fund të vitit 2022, sipas nevojave dhe kërkesave të Autoritetit Kontraktor.
Në tender ka marrë pjesë vetëm kompania “Lajthiza”, e cika ka bërë një ofertë prej 2.164.100 lekë, ose shumë afër fondit limit. Natyrisht që edhe u shpall fituese, teksa ka filluar edhe të furnizojë Bashkinë e Tiranës me ujë të pijshëm.
Pra, përsa kohë që punonjësit do të jenë në zyrat e Bashkisë së Tiranës, do të pinë ujë të pijshëm nga shishe 19 litra që do vendosen në zyrat. Uji nuk do blihet me paratë e punonjësve, por me paratë e taksave të banorëve të Tiranës, të cilët e paguajnë ujin disa herë; në çezma, në markete, në autobote! Madje, ujë për të pirë, gatuar, larë…
Tashmë, kompania fituese “Lajthiza” do të dërgojë në Bashkinë e Tiranës gota plastike dhe shishe me ujë 19 litërshe. Gjithsej do të dërgojë 5.385 copë shishe.
Pra, z.Rama, kryeministër i vendit, a është uji “Lajthiza” nga çezmat e kryeqytetit? Kur nuk e pi kryetari i Bashkisë ujin nga çezmat, duhet ta pinë qytetarët? Përse nuk bën video Lali Eri nga çezmat e Bashkisë së Tiranës duke pirë ujë?!
