Në një konferencë për median ku fillimisht u prezantua java kulturore, kryeministri Edi Rama e quajti thashethem mundësinë që Vali Bizhga, shefja e kabinetit të kryeministrisë të jetë kandidate për presidente.
“Nëse do të bënim një javë kulturore për thashethemet do të ishte një javë ku Shqipëria do të mbante flamurin e kryesuesit të aftësisë prodhuese, por do të doja që të mos e shfokusonim vëmendjen nga kjo nismë sepse është nismë e re dhe e veçantë dhe na duhet mbështetja juaj. Ky procesi i zgjedhjes së presidentit është proces që stimulon thashetheme dhe përzien në vorbull të gjithë emrat dhe njerëzit në të shumtën e herës pa dëshirën e tyre fare. Përgjigjja ime është negative. Nuk ka asnjë të vërtetë në këtë”, tha Rama.
Ishte ish-kryeministri Sali Berisha, i cili pak ditë më parë deklaroi se Bizhga ishte emri i preferuar nga Rama për presidente.
Sipas Berishës, qëllimi i Ramës që të gjejë një person që të jetë i gatshëm për t’u larguar kur ai të dojë të bëhet vetë President.
