Është shoqëruar me debate seanca e sotme plenare, teksa po flitej për konsultimet për presidentin e ri të vendit.
Rama ka akuzuar sërish opozitën, duke e konsideruar si ambasadën amerikane, që cakton se kush do rrijë dhe kush do të largohet. Deklaratën e bëri në përgjigje të deklaratave nga deputetë të opozitës lidhur me faktin që nuk përjashtoi djalin e Aqif Rakipit, të shpallur non grata nga SHBA.
Më herët, Rama u shpreh se nëse Sali Berisha merr drejtimin, ai do të ndërpresë çdo marrëdhënie me PD-në.
Rama: Jeni bërë si ambasadë amerikane këtu në Tiranë. Caktoni se kush duhet të ikë, kush duhet të rijë, kush ka vjedhur e kush s’ka vjedhur. merrni dhe raportin e DASH sikur e keni nxjerrë ju. Është qesharake. Është thjesht qesharake që ju flisni sikur jeni me imunitet diplomatik nga ambasada amerikane dhe vini këtu na bëni leksione. Këto leksione bëjini, gënjeni veten. Unë e kuptoj që diku do kapeni, por kapuni pas flamurit të PD. Flamurin amerikan ka kush e kap, a kapin amerikanët.
Kapni flamurin e PD dhe mundohuni ta ngrini se e keni bërë si çarçafët e shtëpive të qejfit që nuk dihet kush i tund e nuk dihet kush i shkund. Mos hajdeni këtu të tundni flamurin e Amerikës se ka kush e tund. Ne e dimë shumë mirë çfarë bëjmë dhe mos na i qani hallin për marrëdhëniet me Amerikën, Evropën dhe shqiptarët. Janë 3 marrëdhënie të cilat për fat të keq janë ekskluzive tonat. Na keni lënë ju ekskluzivitetin.
