Ish-kryeministri Sali Berisha ripërsëriti këtë të Enjte se procesi i socialistëve për zgjedhjen e Presidentit të ri është një farsë.
Pas përfundimit të mbledhjes së grupit të PD-së, ku pati debate mes Berishës dhe Alibeajt, ish-kryeministri tha se nuk e njeh Alibeajn si kryetar të grupit parlamentar të Partisë Demokratike.
“Në mbledhje të grupit theksova se opozita s’mund të përfaqësohet kurrë me të emëruar nga Taulant Balla. Kjo praktike merr fund e s’do e njohë kurrë PD një praktikë të tillë”, tha Berisha.
Lidhur me procedurat e socialistëve që kanë nisur “konsultime” për zgjedhjen e Presidentit të ri, Berisha tha se procesi është një farsë dhe në fund Rama do zgjedhë atë që ai do.
“Imagjinoni kur zhvillohet me zarfe sekrete brenda grupit parlamentar, se si do të jetë me opozitën. Në radhë të parë përcaktohen rregullat që duhet të kenë ligjin e parë transparencën. Më thoni kush u propozua nga grupi parlamentar? Dini gjë ju? Ai që do Edi Rama u propozua. Ata mund të kenë propozuar 30-40 emra dhe mund të mos jetë fare emri i tij, por ai do të zgjedhë atë që do. Dhe prandaj u vendos sekreti, u bë sekret. Thirret Shoqëria Civile, i thonë mos shqipto emra por dërgoji me email. Atëherë kjo del gjithçka në funksion të narkoshtetit dhe dëshmon se kemi të bëjmë me një narkoshtet. Ça lidhje ka opozita me këtë proces? Nuk ka asnjë lidhje. Nuk mundet opozita të legjitimojë këtë proces. Unë nuk them se nuk i ka votat, por fare mirë të procedojë me votat e tij dhe jo të poshtërojë grupin e vet parlamentar, shoqërinë civile etj, etj…”, tha Berisha.
A ka Komisioni i Rithemelimit një emër për President?
“Ka idera, por sa është racionale?! Mund të propozosh po të kesh vota, por nëse s’ke tallesh me veten tënde”, u përgjigj sh-kryeministri.
Lexo edhe:
Alibeaj: Berisha vjen i paftuar në grupin e PD, jep opinionin e tij
