Një ngjarje e rëndë është zbuluar në Greqi ku një 28-vjeçare rome greke është rrëmbyer dhe shfrytëzuar seksualisht nga një 28-vjeçar shqiptar.
Mediat bëjnë me dije se njohja mes dy të rinjve ka ndodhur përmes Facebook , ku shqiptari i arrestuar është afruar 28 vjeçares me pretekstin se do ta ndihmonte dhe do i gjente punë si kamariere në një kafe.
Që në momentin që vajza ka pranuar ndihmën e tij ka filluar dhe historia e vuajtjeve të saj. I akuzuari u takua me vajzën dhe pasi fillimisht i tha se kishte ndërmend ta ndihmonte për të dalë nga situata e vështirë në të cilën ndodhej, më pas, duke përfituar nga pozita e saj e pambrojtur, e çoi në një apartament në Athinë ku qëndronte në mënyrë të paligjshme.
Më pas ai e detyroi me forcë që të punonte në një bordello, duke i mbajtur të gjitha të ardhurat.
Ndër të tjera, policia nga të dhënat bën me dije se 28-vjeçarja ishte dhunuar, jo vetëm seksualisht por edhe fizikisht. Siç shkruajnë mediat dyshohet se 28-vjeçari e ka goditur shumë egër, madje edhe me zinxhirë, këtë e tregonte gjendja e mjerueshme e vajzës.
Në lidhje me këtë rast janë arrestuar dhe akuzuar dy persona të tjerë, një 40-vjeçar dhe një 61-vjeçar. Sipas autoriteteve greke 61-vjeçari është personi që i kishte dhënë banesën në të cilën ishte ndaluar vajza në mënyrë të paligjshme, ndërsa mësohet se për transportin e saj kishte siguruar edhe një makinë në pronësi të tij. Nga ana tjetër, 40-vjeçari shfaqet si punonjës në një dyqan ku shfaqej vajza, por mohon se e dinte saktësisht se çfarë po ndodhte.
Ndërkohë 28-vjeçari shqiptar identiteti i të cilit nuk bëhet i ditur nuk ishte i panjohur për policinë greke, pasi në vitin 2020 ai akuzohej për një vrasje të mbetur në tentative në një treg publik në Pire.
Ai ishte arratisur nga vendi i ngjarjes para dy vitesh dhe ndaj tij pritej të jepej masa e dënimit prej 10 vitesh burg. Ndërkaq deri më tani ai kishte qarkulluar lirshëm në qytet përmes dokumenteve të falsifikuara.
