Inspektori i Lartë i Drejtësisë kërkon nga KLGJ shkarkimin e gjyqtarit të Elbasanit Taulant Tafa.
Dy vite më parë, Taulant Tafa vendosi uljen e dënimit me 720 ditë për Arben Grorin. Ky i fundit ndodhet pas hekurave pasi është dënuar me burg përjetë për vrasjen e Naim Zyberit në 6 gusht 1997 në spitalin “San Paolo”, Milano dhe për trafik droge.
Sipas ILD-së, vendimi i gjyqtarit ka sjellë cënimin e besimit të publikut te drejtësia.
“Në dhënien e vendimit magjistrati nuk i është referuar fakteve në aktet e dosjes, por ka parashtruar në mënyrë të dukshme fakte dhe rrethana të shtrembëruara vetëm për t’iu përshtatur plotësimit të kërkesave formale të nenit 63 të ligjit nr. 8328/1998, i ndryshuar. ILD ka analizuar vendimmarrjen 4-vjeçare të magjistratit (2017-2021), me objekt ulje dënimi, dhe konstaton, se ndryshe ka vepruar gjyqtari në dhënien e 155 vendimeve të tjera, ku 7 kërkesa janë nga të dënuar me ‘Burgim të përjetshëm’, e ku janë respektuar kriteret formale ligjore. Veprimet/mosveprimet e kryera në kundërshtim me ligjin nga ana e gjyqtarit kanë sjellë si pasojë të drejtpërdrejtë përfitimin e padrejtë nga i dënuari A.G. të uljes së dënimit në masën 720 ditë, si dhe cënimin e prestigjit të magjistratit në veçanti dhe cënimin e besimit të publikut te drejtësia. Veprimet/mosveprimet e magjistratit T.T., përbëjnë shkelje shumë të rëndë disiplinore, që diskreditojnë pozitën dhe figurën e gjyqtarit gjatë ushtrimit të detyrës”, argumenton ILD.
Kërkesa e ILD-së për shkarkimin e gjyqtarit do të shqyrtohet nga Këshilli i Lartë Gjyqësor.
