Lajmi i trishtë i humbjes së njërit prej binjakëve që prisnin Cristiano Ronaldo e Georgina Rodriguez është tema më e diskutuar kudo së fundmi.
Çifti i njohur ka mirëpritur në jetë vetëm vajzën e tyre, pasi djali nuk mundi t’ia dilte mbanë. Në postimin e tyre ata nuk u thelluan në shkaqet e vdekjes së tij, por gjinekologia Mimoza Keta shpjegoi në “Rudina” në Tv Klan se ç’mund të jetë arsyeja e një ngjarjeje të tillë.
“Mundet që ai ta ketë humbur jetën brenda në mitër pa dalë i gjallë jashtë. Te barrat binjake, në 1000 prej tyre, në 12 gra ndodh ky fenomen që njëri nga binjakët nuk jeton.
Kjo mund të ndodhë për arsye shumë të ndryshme. Mund të ndodhë një transfuzion, ata ishin binjakë me dy gjini të ndryshme, njëri fëmijë bëhet marrës i gjakut dhe tjetri dhënës. Ai që bëhet marrës merr më tepër gjak sesa duhet nga fëmija tjetër dhe zhvillimi i këtij të fundit bëhet gjithnjë e më i vogël. Humbja e një binjaku mund të ndodhë në tremujorin e parë të shtatzënisë, ai fëmijë fillon të shkrihet, nëna fillon të ketë sekrecione hemorragjie të pakta, në ekografi vazhdon zhvillimi i një embrioni. Mund të ndodhë në tremujorin e dytë të shtatzënisë dhe duke qenë se shtatzënitë e binjakëve bëhen me prerje cezariane, kemi nxjerrë edhe një fetus të vdekur.”- tha Mimoza Keta.
