Kreu i grupit parlamentar “Aleanca për ndryshim”, Fatmir Mediu, gjatë një konference për shtyp është shprehur se procesi për zgjedhjen e Presidentit të ri të Republikës duhet të synojë konsensusin. Ai tha gjatë fjalës së tij se opozita ka për detyrim që të ofrojë një proces të tillë. Pavarësisht se brenda opozitës janë disa grupe të ndryshme parlamentare, Mediu theksoi se ato duhet të negociojnë si një trupë e vetme.
“Është e nevojshme që procesi të synojë konsensusin dhe jo ndarjen politike për të zgjedhur presidentë që përfaqësojnë interesa të caktuara politike dhe jo interesin e shqiptarëve. Opozita ka detyrimin për të ofruar një proces konsensual. Për këtë ka të nevojshme pavarësisht se përfaqësohet në grupe të ndryshme parlamentare të negociojë si një trupë e vetme, me një përfaqësi që duhet rënë dakord nga të gjithë përfaqësuesit parlamentarë opozitarë, si një trupë negocimi me përfaqësi të plotë të mandatit opozitar. Kjo ka qenë dhe praktika që kemi ndjekur në historinë e zgjedhjes së presidentit të Republikës në vitin 2022, 2007 dhe 2012”, tha Mediu.
Sipas kreut të Partisë Republikane, opozita e ka detyrimin përballë qytetarëve shqiptarë
“Mendoj që opozita ka një detyrim përballë qytetarëve shqiptarë, jo përballë PS. Ka detyrimin përballë Kushtetutës që të gjejë një President që të jetë mbi palët dhe të jetë garant i popullit dhe njëkohësisht të ushtrojë funksionet e tij kushtetuese. Përballë këtij detyrimi ne duhet të përfshihemi në proces. Nëse PS do ketë veprime të njëanshme është përgjegjësi e saj. Përgjegjësia jonë si opozitë është që të kemi një qëndrim të qartë në raport me procesin dhe me përzgjedhjen e presidentit që duhet të jetë mbi palët. Mendoj është përgjegjësi që të tejkalojmë numrat dhe të gjejmë atë marrëdhënie që duhet për të gjetur një president konsensual”, tha Mediu.
Gjatë fjalës së tij, Fatmir Mediu përcaktoi edhe disa fusha që duhen marrë si kritere të zgjedhjes së Presidentit të ri. Ai shtoi se kreu i shtetit mund të jetë nga fusha e politikës diplomatike dhe akademike.
