Nga Boldnews.al
Këshilli i Lartë Gjyqësor, ose siç njihet ndryshe edhe “qeveria e gjyqtarëve”, ka si detyrë kryesore verifikimin e pasurisë për kandidatët për magjistratë të rinj dhe për anëtarë të Gjykatës së Lartë.
Është një detyrë e rëndësishme dhe specifike, sidomos në situatën kur opinioni publik shqiptar vijon të jetë skeptik për integritetin e gjyqtarëve dhe prokurorëve në vend.
Por, duket se edhe vetë anëtarët e “qeverisë së gjyqtarëve” nuk janë edhe aq të imunizuar nga problemet me ligjin për pasurinë.
Maksim Qoku, i cili deri para pak javësh ka mbajtur pozicionin e nënkryetarit të Këshillit të Lartë Gjyqësor, është gjobitur me 300 mijë lekë të reja nga Inspektorati i Lartë i Deklarimit dhe Kontrollit të Pasurive e Konfliktit të Interesave (ILDKPKI).
Qoku u emërua në Këshillin e Lartë Gjyqësor në nëntor të vitit 2018 për një mandat 3-vjeçar, nga radhët e pedagogëve të institucioneve arsimore.
Më tej, ai u zgjodh zëvendëskryetar i KLGJ-së, pas një votimi të kryer brenda radhëve të 11 anëtarëve të institucionit, në Dhjetor 2018.
Qoku ishte ende anëtar në detyrë, kur Inspektorati i Deklarimit të Pasurive, me vendimin nr. 38, datë 1 Nëntor 2021, vendosi ta gjobisë atë me shumën 500 mijë lekë të reja, për shkak të shkeljeve të ligjit “Për pasurinë”.
Drejtuesi i lartë i KLGJ-së e ankimoi vendimin në Gjykatën Administrative të Tiranës.
Kjo e fundit, në 7 Shkurt 2022, pranoi pjesërisht padinë, duke zbritur masën e gjobës nga 500 mijë lekë në 300 mijë lekë.
Në foto: Vendimi i Gjykatës Administrative Tiranë për lëshimin e urdhërit të ekzekutimit të gjobës ndaj Maksim Qokut
Por, mesa duket, Maksim Qoku nuk e ka respektuar vendimin e Gjykatës dhe ILDKPKI është detyruar t’i drejtohet Gjykatës Administrative të kryeqytetit, me kërkesë lëshimin e urdhërit të ekzekutimit të detyrueshëm të gjobës.
Në 28 Mars të këtij viti, Administrativja e Tiranës pranoi kërkesën e Inspektoratit të Deklarimit të Pasurive, duke nxjerrë urdhërin e ekzekutimit, i cili detyron Maksim Qokun, tashmë i larguar nga Këshilli i Lartë Gjyqësor, që të paguajë masën administrative për shkeljen e ligjit “Për pasurinë”.
