Lacio dhe Torino kanë luajtur sot një ndeshje ku viheshin përballë dy portierët e përfaqësueses shqiptare, Thomas Strakosha dhe Etrit Berisha, me këtë të fundit që kthehej në stadiumin ku u bë i njohur për publikun italian disa vite më parë. Një duel që është mbyllur me barazim në shifrat 1-1, pavarësisht përpjekjeve të dy portierëve për të ruajtur rrjetat e paprekura.
Në pjesën e parë, si Strakosha, ashtu edhe Berisha kishin pak punë për të bërë, me të parin i cili u shpëtua nga shtylla teksa i mohoi më pas Riçit golin e avantazhit. Nga ana tjetër ishte Berisha i cili bllokoi Milinkoviç-Saviç.
Situata ndryshoi në pjesën e dytë, kur pas një goditje nga këndi, Pelegri shënoi me kokë i vetëm në zonë, me Strakoshën që nuk mund të bënte asgjë.
Goli zgjoi Lacion që kërkoi me ngulm rrjetën, por u përplas me mbrojtjen e ngjeshur të Torinos dhe Berishën e vëmendshëm. Megjithatë, ky i fundit nuk mund të bënte dot asgjë në minutën e 92-të, kur Imobile përfitoi nga një top pas shpine i Milinkoviç-Saviç për të barazuar shifrat e këtij dueli, pa ndryshuar shumë situatën e dy skuadrave në renditjen e kampionatit italian.
