Policia e Gjirokastrës ka bllokuar një mjet furgon, i cili po transportonte 64 emigrantë nga vendet e treta.
Mësohet se mjeti u ndal në afërsi të fshatit Dervician të këtij qyteti.
Policia i ka bërë shenjë ndalimi automjetit tip furgon me drejtues shtetasin Egzon Isufi, i cili është larguar me shpejtësi, duke braktisur automjetin.
Gjatë kontrollit në automjet janë gjetur 64 emigrantë të paligjshëm nga vendet MENA, të cilët ky shtetas po i transportonte kundrejt fitimit.
Njoftimi i plotë:
Policia e Gjirokastrës ka bllokuar një mjet furgon, i cili po transportonte 64 emigrantë nga vendet e treta. Mjeti u ndal në afërsi të fshatit Dervician.
Shërbimet e Policisë, pas informacioneve të siguruara në rrugë policore, i kanë bërë shenjë ndalimi automjetit tip furgon me drejtues shtetasin Egzon Isufi, i cili nuk i është bindur urdhrit për të ndaluar, por është larguar me shpejtësi, duke braktisur automjetin.
Pas disa minutash ndjekje, drejtuesi i mjetit, shtetasi Egzon Isufi, 24 vjeç, banues në Kosovë, është vënë në pranga nga shërbimet e Policisë.
Gjatë kontrollit në automjet, shërbimet e Policisë kanë gjetur 64 emigrantë të paligjshëm nga vendet MENA, të cilët ky shtetas po i transportonte kundrejt fitimit.
Në vijim të operacionit, pas hetimeve paraprake të kryera për këtë rast, është bërë i mundur identifikimi dhe shpallja në kërkim e 2 bashkëpunëtorëve të tjerë, shtetasve F. M., 34 vjeç, banues në Kosovë dhe E. Z., 27 vjeç, banues në Kukës. Vijon puna për kapjen e tyre.
Në cilësinë e provës materiale u sekuestruan automjeti dhe një aparat celular dhe 3.400 euro.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprat penale “Dhënia ndihmë për kalim të paligjshëm të kufirit”, e kryer në bashkëpunim dhe “Mosbindja ndaj urdhrit të punonjësit të policisë së rendit publik”.
