Kryeministri Edi Rama ka shmangur komentet për shpalljen “non grata” nga autoritetet amerikane të ish-deputetit socialist Aqif Rakipi.
Rama, i cili prej ditës së djeshme është në një vizitë në Gjermani, zhvilloi një bashkëbisedim me gazetarët në Berlin.
Ai u pyet edhe për shpalljen non grata të ish-deputetit socialist, Aqif Rakipit.
Pyetja: Zoti kryeministër, ju keni lënë jashtë zonës së sigurt socialistë që kanë kontribute në parti, ndërsa në Kuvend sot keni djalin e një personi që është shpallur non-grata, si mendoni, keni marrë vendimin e duhur?
Rama shmangu komentet.
“Të vijmë deri në Berlin për të folur për kandidatët e PS në Tiranë më duket pak e sforcuar, kështu që kalojmë në pyetjen tjetër”, tha ai.
Shtetet e Bashkuara njoftuan të Hënën sanksione ndaj disa personave në Ballkanin Perëndimor, përfshirë ish-deputetin socialist Aqif Rakipi.
“Aqif Rakipi është një ish-deputet famëkeq nga Elbasani, i cili ka një ndikim dëmtues dhe destabilizues në proceset politike në Shqipëri”, thotë Departamenti i Thesarit.
Deklarata thotë se grupe të shumta të krimit të organizuar në Shqipëri kanë ofruar para, dhurata ose premtime për vende pune ose favore në këmbim të votave për partinë e tyre politike të preferuar.
“Rakipi ka qenë prej kohësh i përfshirë në krimin e organizuar dhe është i lidhur ngushtë me një Grup të Krimit të Organizuar, brenda së cilit ai ka ushtruar ndikim politik, përfshirë edhe korrupsionin. Për shembull, Rakipi ka përdorur ndikimin e tij politik për të emëruar miqtë e tij në postet kryesore publike në Elbasan dhe Tiranë”, thotë Departamenti i Thesarit.
Ndërsa ish-deputeti Rakipi u përjashtua nga parlamenti për shkak të ligjit të dekriminalizimit, djali i tij Ornaldo Rakipi u përfshi në listat e kandidatëve socialistë për Tiranën, dhe mundi të zgjidhej deputet falë një numri të lartë votash personale që arriti të mbledhë, duke thyer herësin.
