Kryebashkiaku i Tiranës, Erion Veliaj ishte një tjetër syresh i cili u mburr për ‘punët e mira’ të qeverisë në Kongresin e PS.
Veliaj mburri dhe veten duke thënë se sot Tirana është bërë më atraktive dhe se gjatë qeverisjes së tij është rritur vlera e pronës.
”Qyteti po rritet në përmasa të jashtëzakonshme. Tirana para 7 vitesh rritej me një numër shumë të vogël banorësh, 4-5-6 mijë. Vjet është rritur me 32 mijë. Do të thotë që Tirana është bërë aq atraktive saqë jo vetëm nga të gjithë cepat e Shqipërisë, sot kemi italianë që jetojnë në Tiranë, sot kemi shumë prej shqiptarëve të rajonit që e kanë patjetër një apartament në Tiranë, të imagjinosh që nuk ka as det”, tha Veliaj, i cili konfirmoi se do të garojë për një mandat të tretë në zgjedhjet e ardhshme.
“Do të thotë që mjafton të shikosh faktin që Tiranës çdo vit, në 7 vitet e fundit, i është rritur vlera e pronës me 10-15% do të thotë që dhe kundërshtari ynë më i madh vetëm duke ndenjur në shtëpi dhe duke sharë në Facebook është bërë më i pasur”, deklaroi Erion Veliaj.
