Policia e Italisë ka shkatërruar një bandë shqiptaro-tuniziane, që trafikonte kokainë në qytete të ndryshme të Italisë.
Banda ua shiste drogën të rinjve, por edhe të miturve. Grupi i shqiptarëve bënte furnizimin me lëndët narkotike, ndërsa tunizianët e shisnin në rrugë.
Të gjithë të arrestuarit janë me origjinë shqiptare ose tuniziane dhe variojnë nga mosha 20 deri 40 vjeç, shkruajnë mediat e vendit fqinj.
Grupi shqiptar furnizonte për çdo javë grupin tunizian në Trieste dhe ishin tunizianët ata që bënin tregtimin tek konsumatorët.
Substanca e blerë, pasi ishte prerë dhe paketuar, rishitej me pakicë nëpërmjet një rrjeti të gjerë të përbërë kryesisht nga subjekte të tjera me origjinë afrikano-veriore, të cilët ishin zhvendosur në vende të posaçme në Trieste.
Policia kreu gjithashtu edhe kontrolle ndaj 10 personave të tjerë që dyshoheshin se ishin pjesë e këtyrë grupeve kriminale. Mes 8 personave që përfunduan në pranga, një u arrestua mbrëmjen e djeshme në Piazza Garibaldi. Ai është një person me origjinë tuniziane i kapur në flagrancë, i cili u shiste kokainë të rinjve vendas.
Hetimet në lidhje me këtë bandë bënë të mundur arrestimin e 4 personave dhe çuan në sekuestrimin e mbi një kilogram e gjysmë kokainë të pastër, të cilën grupi e shiste në qendër të Triestes.
Në këtë operacion u angazhuan më shumë se 60 agjentë të policisë në bashkëpunim me Skuadrat Lëvizëse të Venecias, Padovës, Trevisos, Pavias dhe Rovigos. Në operacion morën pjesë edhe departamentet e qenve të Policisë së Shtetit dhe Parandalimit të Krimit.
