Qytetarët e Durrësit prej ditësh janë përballur me rritjen e çmimit të vezës, një produkt bazë i shportës së konsumit.
Brenda javës çmimi ka shkuar nga 170 lekë të vjetra për kokërr në 300 lekë të vjetra për kokërr, gati dyfish. Akoma më shqetësues është fakti se tregtarët kanë paralajmëruar rritjen e mëtejshme e çmimit pas marrjes së furnizimit ditën e hënë nga pularitë kryesore.
Ky çmim i kripur i është faturuar ngordhjes së afro 200 000 pulave nga sëmundja e laringo tracheit, por nga burime të sigurta është thënë se pularitë e qytetit po punojnë me kapacitet të plotë dhe kanë bërë zëvëndësimet e nevojshme për të mos krijuar mungesa në treg.
Qytetarët nga ana e tyre janë shprehur të pakënaqur dhe të irrituar pasi nuk mund të përballojnë blerjen e një kokrre veze pulari me 300 lekë të vjetra me rrogat, pensionet dhe ndihmat ekonomike që marrin.
“Nuk ha vezë, i kam dhënë zgjidhje”.
“Do marrim borxh, çdo bëjmë pa ngrënë nuk do rrimë”, shprehen qytetarët.
Ndërkohë qytetarë të tjerë janë shprehur se presin zgjidhje nga qeveria, e cila duhet të marrë masa për këtë situatë ose do të vijojnë protestat
Përveç rritjes së çmimit të vezës në treg janë rritur edhe produkte të tjera si: vaji, mielli dhe produktet e bulmetit të cilat janë të pazëvëdësueshme në tryezën e çdokujt.
