Kryeministri Edi Rama, gjatë një aktiviteti këtë të Premte në Universitetin Bujqësor të Tiranës, ka bërë një batutë duke kujtuar kohën e komunizmit në vend. E pranishme ishte dhe ambasadorja amerikane Yuri Kim.
Gjatë takimit me përfaqësues të Universitetit Bujqësor të Tiranës dhe atij të Michiganit, ku e pranishme ishte edhe ambasadorja amerikane, kryeministri Edi Rama bëri një batutë.
Rama shpotiti fjalimin e rektorit të UBT-së, duke hequr një paralelizëm me fjalimet që bëheshin në kohën e komunizmit.
“Na vjen mirë që jemi të gjithë bashkë këtu edhe me ambasadoren. Më pëlqeu shumë ajo pjsesa që tha rektori, ‘ju garantojmë zonja ambasadore’. Më kujtoi kohën kur vinte sekretari i partisë nga komiteti dhe i thoshte ai dekani i vjetër ‘ju garantojmë shoku sekretar i komitetit të partisë që ne do punojmë që partia dhe populli të jenë krenarë për ne’. Edhe ne ju garantojmë, patjetër. Faleminderit shumë. Këto kisha unë. Suksese dhe rroftë miqësia shqiptaro-afgane”, u shpreh Rama.
Batuta krijoi ilaritet mes të pranishmëve. Buzën në gaz e vuri dhe ambasadorja Yuri Kim e cila iu drejtua Ramës: Çfarë ka që nuk shkon me ty?!
(Mes tyre zhvillohet një diskutim i shkurtër disa sekonda pa mikrofon)…
Yuri Kim: Jam e sigurt që përkthimi nuk ishte në rregull. Dëgjova diçka shumë të çuditshme.
Edi Rama: Sigurisht, është faji i përkthyesit shqiptar. Thjesht pushoje…
Gjatë aktivitetit, ambasadorja Kim tha se në kohën kur shpërtheu dhuna në Afganistan, ishte pikërisht Shqipëria ajo që udhëhoqi botën duke hapur dyert e shtëpisë për të strehuar afganë.
Në takim u njoftua nënshkrimi i një marrëveshjeje bashkëpunimi mes Universitetit Bujqësor të Tiranës dhe Universitetit të Miçiganit në SHBA.
