Nga Boldnews.al
Një video e publikuar në rrjete sociale, tregon një situatë absurde ndërmjet një punonjësi të Policisë së Shtetit dhe një djali të ri, i cili po kalonte pasditen në shoqërinë e miqve të Tiranë, në një zonë të Tiranës.
Punonjësi i Policisë kishte ndaluar të riun dhe i kërkonte me këmbëngulje që të ushtronte kontroll fizik. Nga ana tjetër, djaloshi, jo më shumë se 25 vjeç, në të drejtën e tij, e kundërshtonte kërkesën e policit dhe i kërkonte arsyet se përse duhej ushtruar ai kontroll.
Debati vijoi për disa minuta, ku zyrtari i shtetit jepte si argument uniformën e Policisë për të kryer kontrollin fizik, megjithëse, siç u kuptua, nuk kishte asnjë arsye apo dyshim minimal mbi ndonjë veprim të paligjshëm të të riut.
Kjo është një prej situatave që përsëritet rëndom në Tiranë, por edhe në qytete të tjera. Punonjësit e Policisë, sidomos ata që shëtisin me automjete plot drita, e kanë shndërruar në rutinë “kontrollet fizike” në rrugë, edhe kur nuk kanë asnjë arsye të ligjshme.
Policia e Shtetit ka një rol të rëndësishëm për parandalimin e krimit, megjithëse shpesh ka dështuar ta kryejë plotësisht këtë rol.
Kontrolli i identitetit të elementëve të dyshimtë, por edhe kontrolli fizik i personave, është detyrë funksionale e Policisë së Shtetit.
Por, këto veprime kryhen në bazë të ligjit. Dhe ligji “Për Policinë e Shtetit”, pra ai akt mbi bazën e të cilit kryejnë detyrën edhe punonjësit e Patrullës që shfaqen në videon e publikuar në rrjetet sociale, i ka shumë të qarta rastet kur kryhet kontrolli i identitetit dhe kontrolli fizik.
Neni 110 i ligjit “Për Policinë e Shtetit”, me titull “Kontrolli i identitetit”, parashikon se punonjësi i Policisë bën kontrollin e identitetit të personit në këto raste:
a) është i pranishëm ose në afërsi të drejtpërdrejtë me vendngjarjen dhe për persona që kanë dijeni për rrethana të ngjarjes;
b) ndaj tij ekzekutohet një urdhër i organeve përkatëse;
c) është i dyshuar për cënim të rendit dhe sigurisë publike;
ç) hyn ose del nga territori i Republikës së Shqipërisë;
d) për rrethana të kohës dhe vendit, dyshohet se është përfshirë në veprime të jashtëligjshme.
Në rastin e videos konkrete dallohet qartësisht se Policia nuk ka asnjë dyshim mbi djaloshin. Megjithatë, edhe nëse do të kishte ndonjë lloj dyshimi, edhe minimal, ligji sërish e orienton mënyrën e të vepruarit.
“Për një identifikim të besueshëm të personit, punonjësi i policisë bazohet në dokumentet ligjore të identifikimit”.
Por, punonjësi i Policisë në video, ashtu si edhe në shumë raste të ngjashme, kërkon me këmbëngulje të kryer kontroll fizik të qytetarit.
Ligji “Për Policinë e Shtetit”, edhe në këtë pikë, është shumë i qartë:
“Punonjësi i policisë mund të kontrollojë çdo person të arrestuar ose të ndaluar, në përputhje me Kodin e Procedurës Penale dhe legjislacionin në fuqi…”, thuhet ndër të tjera në nenin 113.
Djaloshi në video nuk ishte as i ndaluar e aq më tepër i arrestuar. Ai ishte në shëtitjen e mbrëmjes me miqtë e tij, pa krijuar asnjë lloj problematike të evidentuar nga Policia apo ankesë qytetari.
Pra, i riu i duhej nënshtruar kontrollit fizik, vetëm e vetëm se punonjësi i Policisë së Shtetit kishte dëshirë të kryente këtë veprim dhe, me forcën e uniformës, i diktohej paligjshmërisht qytetarit.
