Gjykata e Apelit Tiranë ka dënuar me 18 vite burg Nevaldo Hajdarajan, i cili u shpall fajtor për vrasjen e Klodian Rashës. Për shkak të gjykimit të shkurtuar, ish-efektivit të forcave “Shqiponja, i ulet dënimi në 12 vite burg.
Në seancën e zhvilluar sot, pala mbrojtëse ka thënë se vrasja u krye në kushtet e mbrojtjes së nevojshme ndaj duhet të hiqet akuza për vrasje me dashje. Ndërsa prokurorja Arta Marku është shprehur se Hajdaraj duhet të dënohet me 20 vite burg, pasi sipas saj, nuk është i sinqertë në dëshminë e tij. Prokurorja kërkoi që të mos i pranohej gjykimi i shkurtuar. Të dyja kërkesat nuk u morën parasysh nga gjykata.
Në shkallën e parë, Nevaldo Hajdaraj u dënua me 10 vite burgim.
Më 8 Dhjetor 2020, Klodian Rasha u qëllua pas shpine nga Hajdaraj me armën e shërbimit gjatë orës policore. Sipas dëshmisë të autorit, viktima nuk iu bind urdhrit të efektivëve të policisë për të ndaluar. Ai tha se e qëlloi pas një ndjekje pasi pikasi një send që Rasha kishte me vete, e që iu duk si armë zjarri.
Policia njoftoi pas ngjarjes se një pistoletë u gjet në një pellg me ujë pranë vendit ku u vra Rasha. Megjithatë, nga hetimet nuk u provua se arma ishte e viktimës. Madje, u hodhën akuza se arma është vendosur për të manipuluar ngjarjen dhe lehtësuar pozitën e efektivit të policisë qëlloi për vdekje të riun.
Vrasja solli një valë protestash në Tiranë, që pasuan me dorëheqjen e Sandër Lleshajt nga posti i Ministrit të Brendshëm. Ngjarja u bë kryefjalë për disa ditë me radhë dhe akuza ndaj efektit të policisë ndryshoi. Fillimisht, ai u akuzua për vrasje nga pakujdesia, ndërsa më pas ajo u klasifikua në vrasje me dashje.
Pamjet e vrasjes
