Nga Boldnews.al
Avokati i Popullit është një nga institucionet kushtetuese, i cili funksionon prej shumë vitesh në Shqipëri. Drejtohet nga një “krye avokat”, ndërkohë që komisionerët lëvizin në gjithë vendin. Shkojnë në institucione të ndryshme, me kërkesë të njerëzve të thjeshtë, ndërkohë që bëjnë rekomandime dhe ndjekin rrugën e kthimit të përgjigjes nga institucionet. Por, prej shumë vitesh, ky institucion ka një flotë të vjetër të automjeteve, disa prej të cilëve të dala jashtë përdorimi, apo të tjerë me probleme të mëdha mekanike.
Sipas informacioneve që disponon BoldNews.al, Avokati i Popullit i ka bërë kërkesë Kuvendit të Shqipërisë për t’u miratuar një fond që të rinovojnë këtë flotë makinash. Duke qenë institucion i “krijuar” nga Kuvendi, ky i fundit i ka dhënë dritën jeshile që të rinovojnë flotën e automjeteve, teksa u kanë miratuar edhe fondin për të blerë mjete të tilla.
Sipas dokumenteve që disponon BoldNews.al, institucioni i Avokatit të Popullit ka hapur tenderin me objekt “blerje automjeti për institucionin” e Avokatit të Popullit. Sipas dokumenteve, fondi është 3.333.333 lekë pa TVSH, ose me TVSH shuma shkon në rreth 40 milionë lekë të vjetra. Tenderi është hapur para pak ditësh nga ky institucion, ndërsa mësohet se aprovimi është marrë nga Kuvendi i Shqipërisë. Pritet që zarfet e kompanive të interesuara do të hapen në datën 23 mars 2022. Sipas informacioneve të redaksisë tonë, Avokati i Popullit i ka kërkuar Kuvendit miratimin e një fondi për automjete të tilla, fond i cili është miratuar dhe më pas janë bërë këto procedura tenderuese.
Në dokumentet shoqëruese, Avokatja e Popullit ka kërkuar një mjet tip fuoristradë 4X4, me karroceri SUV. Të jetë me cilindratë 2.0, me naftë ndërsa me normë ndotje euro 6. Të jetë një mjet me kamio automatike, me ngjyrë gri ose e zezë, ndërsa mjeti të ketë kamera parkimi mbrapa.
Gjithashtu të ketë “asistent nisje në malore”, “timon me komanda për radio dhe bluetooth”, “sedilja e shoferit me rregullim elektrik”, “xhama të errët mbrapa”, “sensorë parkimi”. etj, etj. Gjithashtu kërkohet që mjeti pilot automatik, kompjuter bordi si dhe, pas tenderit, koha e lëvrimit të bëhet brenda 15 ditëve.
Të ketë një garanci prej 2 vitesh, ndërsa në çmim të përfshihen të gjitha detyrimet për taksat doganore, regjistrimi i automjetit, siguracioni TPL + Full Casco dhe pajisja me targa.
