Nga Boldnews.al
“Je me fat, se sapo u ul çmimi i naftës”, iu drejtua punonjësi i një karburanti në Yzberisht gazetarit të “Boldnews.al”, i cili po furnizonte mjetin e tij. “Para 10 minutash u ul në 223 lekë për litër”, vijoi ai.
Ora shënon 9.50 e paradites së të Premtes dhe në radion e mjetit dëgjohej ende fjalimi i gjatë dhe patetik i kryeministrit Edi Rama, që po zhvillonte një takim me përfaqësuesit e kompanive të karburanteve në Shqipëri.
Rama premtoi se brenda fundjavës, Qeveria do të nxjerrë një Akt Normativ, për të stabilizuar çmimin e naftës, i cili arriti vlera stratosferike në mesin e kësaj jave.
Kryeministri përsëriti frazës se çmimet janë rritur ndjeshëm për shkak të luftës në Ukrainë dhe se qeveria e tij do të marrë masa për të ndikuar në zbritjen e çmimit të naftës.
Por, ende pa u hartuar e miratuar ky Akt Normativ, çmimi i naftës u ul ndjeshëm, megjithëse vijon të mbetet ende shumë i lartë, krahasuar me fundin e muajit Shkurt.
Në një vëzhgim që bëri “Boldnews.al” në pika të ndryshme karburanti këtë paradite, çmimi i naftës ishte fiksuar kudo në vlerën 223 lekë për litër.
Pra, Rama arriti që vetëm me një fjalim dhe takim të ulë disi çmimin e naftës, duke forcuar bindjen publike se nocionet “bursa”, “tregu”, “lufta” e të tjera të ngjashme janë thjesht mbulesa të një strategjie qeveritare në dëm të buxhetit të qytetarëve.
Çmimi i naftës, e bashkë me të edhe ato të të gjithë ushqimeve, përfshirë produktet më të domosdoshme të shportës, shënuan një rrije të ndjeshmë në fillim të muajit Mars 2022.
Qeveria deklaroi se kjo është pasojë e luftës Rusi-Ukrainë, e cila ka reduktuar furnizimin e Europës, përfshirë edhe Shqipërinë me naftë dhe lëndë të para ushqimore.
Rama dhe ministrja e Infrastrukturës, Belinda Balluku, lëshuan alarmin e rritjes së çmimeve të naftës dhe energjisë elektrike në fillim të kësaj jave, para se të niseshin për një udhëtim turistiko-qeveritar në Dubai, të shoqëruar edhe nga ministri i Brendshëm, Bledi Çuçi, ajo e Financave, Delina Ibrahimaj dhe ministrja e Kulturës, Elva Margariti.
Udhëtimi i Ramës tek sheikët e Dubait iu ndërpre nga protestat anti-qeveritare poshtë zyrës së tij dhe në qytete të tjera të vendit, ku qytetarët e revoltuar kërkojnë ndërhyrjen e qeverisë për uljen dhe stabilizimin e çmimeve.
Rama fillimisht u konfliktua në rrjete sociale me qytetarët dhe përdori forcën e policisë për të dekurajuar qytetarët protestues.
Këto manovra nuk penguan protestuesit dhe kryeministri u detyrua të nisë serinë e takimeve për të menaxhuar situatën.
Hapi i parë është takimi me përfaqësues e biznesit të karburanteve, nga ku ai deklaroi se do të ngrihet një Komitet ndërmjet qeverisë dhe privatëve, për të kontrolluar çmimin e naftës.
Kjo nismë mbetet për t’u parë në ditët në vijim, ndërkohë që qytetarët protestues vijojnë të përballen me forcat jo-proporcionale policore.
