Ashtu si një ditë më parë, disa qindra qytetarë të Tiranës, kanë shprehur revoltën e tyre ndaj rritjes së çmimeve, duke bllokuar disa nga akset rrugore në kryeqytet.
Pas protestës që zgjati rreth dy orë para godinës së Kryeministrisë, të revoltuar edhe nga deklaratat e Edi Ramës, protestuesit janë ndarë në grupe të vogla, duke bllokuar qarkullimin e disa akseve, qoftë në Unazën e qytetit, atë afër Shallvareve, bulevardin Dëshmorët e Kombit etj.
Kjo situatë ka shkaktuar përplasje me policinë e cila kërkonte që të zhbllokoheshin rrugët, pasi kishin krijuar probleme me qarkullimin e makinave. Policia ka ndërhyrë me dhunë për të larguar protestuesit në mënyrë që të vijojë qarkullimi i mjeteve.
Nën moton as të majtë, as të djathtë, por popull, qytetarët kërkojnë nga qeveria uljen e taksave, subvencione dhe ngrirjen e çmimeve për produktet e shportës.
