Disa mijëra shqiptarë anembanë vendit po protestojnë kundër rritjes së çmimeve jo vetëm të karburanteve, por edhe të produkteve kryesore, përfshi edhe atyre që konsiderohen të shportës.
Nga Saranda në Shkodër e Kukës, qytetarët janë organizuar përmes rrjeteve sociale, duke shprehur revoltën e tyre, ndërsa në Tiranë janë mbledhur në bulevardin “Dëshmorët e Kombit”, para godinës së Kryeministrisë.
“Shteti oligarkëve, shteti i oligarkëve”, janë thirrjet e qytetarëve të mbledhur poshtë zyrës së Kryeministrit Edi Rama, ndërsa mbi të hidhen akuza se për shkak të taksave të larta dhe vjedhjeve, korrupsionit dhe keqqeverisjes, shqiptarët po vuajnë sot pasojat e rritjes së çmimeve.
Një thirrje iu drejtua edhe SHBA dhe BE për të ndihmuar shqiptarët në përballjen me regjimin e Edi Ramës.
Protestës iu drejtuan me mesazhe emra të njohur, por edhe qytetarë të thjeshtë, ndërsa Edi Ramës iu kërkua të reflektojë, pasi protestat nuk ndalen.
“Boll është boll, boll me grabitje dhe vjedhje”, u theksua në protestë, ku u lëshuan batuta edhe në drejtim të ministres Belinda Balluku, për të cilën u tha se “edhe kur shkon të lyejë flokët, merr eskortën me vete”.
